La pynkut ïa ka jingrakhe dap 50 snem ka WJDSA
U symbud Myntri rangbah ka sorkar jylla u ma Sniawbhalang Dhar mynta ka sngi u la wan ban pynhap pyrda ia ka jingrakhe dap 50 snem ne ka Golden Jubilee Celebration jong ka West Jaiñtia District Sports Association (WJDSA), ha kane ka sngi la donlang ruh u myntri ka tnat Sports u bah Shakliar Warjri, MLA ka Jowai ma Wailadmiki Shylla, ki nongkitkam ka WJDSA, ki khynnah skul bad kiwei kiba la shah khot sngewbha. Ia kane ka jingpynhap pyrda la pynlong ha Kiang Nangbah Stadium, Ladthadlaboh Jowai.
Ha kane ka sngi khadduh jong ka jingrakhe kum ka dak ban leh burom ia ki dkhot Association, ki referee bad nongialehkai Sports bapher bapher kane ka District kiba la shim bynta kylleng kylleng, la don ka jingpynkup burom sah kynmaw ia ki da kaba ai da ki Mementos bad ha ka juh ka por ka Association ka sam ruh ia ki mementos sha ki longing jong dkhot jong ka kiba la khlad noh naduh ba la sdang ia kane ka Association.
Mynta ka sngi na ka liang u ma Sniawbhalang Dhar ula kular ban ai haduh 25 klur tyngka na ka bynta ban pynbit pynbiang bad pynbha shuh shuh ia ka Kiang Nangbah Stadium. U ma Dhar ula ong ruh ba un ai shiphew lak tyngka na ka bynta ban pynlong ia ka lympung open to all football ka ban tip ha ka kyrteng u kpa jong u, u (L) K. Pala u ba dang shu khlad shen.
Na ka laing u ma Sniawbha u la ong ruh mynta ki sngi ka jingialehkai sports khamtam ka phutbol kam dei shuh tang ban kilan met ne ban rahnam iala ka jong ka kynthun hynrei ka dei kam kamai kajih.
U ma Sniaw u la ai ruh ka jingiaroh ia ki nongkit kam Association kiba naduh mynshwa haduh mynta ka jingiaid lynti ka jong ki kaba la dap 50 snem, da kaba u la ong ruh kam dei ka kam kaba suk ban shakri ia kane ka kam khlem kano kano ka jingsiew, hynrei dei ka jingtrei shitom jong kine ki nongkit kam naduh mynshwa haduh mynta la lah ban pyniaid ia sibun ki kam jong ka association ha ka jingiadei bad ki kam ialehkai sports bapher bapher.
La pynphuh pynphieng shuh shuh ia kane ka sngi khadduh jong ka jingrakhe da ki jingshad jingrwai bad leh Drill, kaba la shim bynta da ki khynnah skul bad ki dong jong ka sor Jowai.
