Hynne ka sngi ka 30 Risaw 2025, u Myntri Rangbah ka Jylla, u Conrad K. Sangma u la hiar sha Thangsning, Mawkynrew Block, East Khasi Hills District na ka bynta ban iakynduh markhmat ia ki nongshong shnong bad ban sngap ia ka jingeh bad ki jingaijingmut jong ki kaba dei shi bynta jong ka CM Connect Programme.
Ha ka jingioh kabu ban iakren bad u Myntri Rangbah, ki paidbah ka thaiñ Mawkynrew ki la pynpaw ia ka jingdonkam ban buh ia ka Higher Secondary School bad ka College hapoh jong ka Konstitwensi. La pynsngew ruh ia ka jingdonkam ban pynioh ia ka Anganwadi Centre, Veterinary Hospital, ka Um bam Um dih kaba biang, ka jingshna ia ki Surok bad ki Jingkieng, ki madan Artificial Turf, ka jingpynbha ia ka Bording bad kiwei.
Na ka liang u Myntri Rangbah u la pyntip ia ki paidbah ba yn sa mang 13.35 klur na ka bynta ka Jingkieng Jongksha-Thynroit. U la mynjur ba yn mang ruh ia ka pisa na ka bynta ka Madan Artificial Turf kaba don markhap bad ka Indoor Stadium ha Mawkynrew Constituency.
Shuh shuh u la ong ba yn sa shna 1700 tylli ki Anganwadi Centre ha kylleng ki shnong kiba don ha ka Jylla lyngba ka State Scheme. 60 Lak yn sa pynlut na ka bynta ban maramot ia 20 tylli ki Anganwadi kiba la don lypa ha ka Jylla, iathuh u Sangma.
Ha kaba iadei bad ka Veterinary Hospital, u MR u la iathuh ba la dep ban bthah sha ki bor pyniaid ba kin pyntikna ba ka jingioh ia ki dawai ha 3 tylli ki Dispensary kiba don hapoh jong ka Block kan long kaba khlem jingduna.
Nalor kata, u Conrad u la ai ruh ka jingtikna ba yn sa bishar bniah ia ka jingdonkam ban pynioh ia ka Higher Secondary School, College, ka Umbam Umdih kaba biang ba ki paidbah ka thaiñ kin kiew ha ka pule puthi bad ka roi ka par.
