Hadien shisnem pura ba ka Nongtluh – Mathan bad Marmain Development Forum (NMMDF) ka la dawa na u Myntri Rangbah ka Jylla na ka bynta ban pynioh noh sa kawei pat ka Community & Rural Development (C&RD) Block ha ka Thain Ri Bhoi District, hynne ka sngi ka 21 Risaw 2025, ka NMMDF hapoh ka jingialam jong u MLA ka Nongpoh Bah Mayral Born Syiem ki la leit ban iakynduh pat sa ia u Symbud Myntri Rangbah ka Jylla Bah Prestone Tynsong na ka bynta ban buddien bad pynkynmaw ia u ia katei ka mat jingdonkam jong ki Paidbah ka Ri Bhoi.
Na ka liang u Bah Mayral u la iathuh ba ka C&RD Block Umling kaba don mynta ha kitei ki thaiñ ka la khia namar la don haduh 223 tylli ki shnong. Kumta ban ban pynjan, pynsuk bad pynmyntoi ia ka jingdonkam jong ki Paidbah la donkam kyrkieh ban ioh sa kawei pat ka C&RD Block ha Umden. Shuh shuh u la iathuh ba ki paidbah bad baroh ki nongshong shnong ki la kwah dik dik ban ioh ia katei ka jingdawa ha kaba la don ruh kiba la ai ia ka jaka na ka bynta ban buh ia katei ka ophis treikam.
Hadien ba la ioh ban iakynduh ia u Symbud Myntri Rangbah, na ka liang u Bah Mayral bad ki paidbah kiba la wan ban synran lang, ki la pynpaw ia ka jingsngewhun namar ba u Bah Prestone u la kloi ban iakren bad mynjur ruh ban shimkhia ia kane ka mat ha kaba u la kular ban bthah ia u DC Ri Bhoi bad ia ka tnad ba khmih ia kane ka bynta ban bishar halor kane ka mat jingdawa.
