Ka Dorbar Shnong Kharkhana jong ka Elaka Satpator Dolloiship kaba hap hapoh ka Amlarem Block, ka la pynlong ia ka jingiatrei Shnong ha ka 28.10.2021 bad kane ka rukom trei shnong ka iapher na kiwei pat ki rukom trei ne pynkhuid shnong. Kane ka trei shnong ka long shi bynta kum ka dak ka jingkmen ia ka jingioh ia u surok rong uba jngai kumba 6 km tam eiei uba iaid lyngba kane ka shnong, na Lumpyngngad ter ter shwa ban poi shnong Borghat, ia une u surok la ieh da ki phew snem khlem maramot ne shna pynbha.
Ki paidbah nongshong shnong ki la mih paitbah bad iasnoh kti lang bad ki contractor kiba pyntrei ia une u surok bad kumjuh ia ka tnad PWD ka sorkar jylla. Ha kane ka sngi ki paitbah ka shnong ki la pyllut bor bad sngi da kaba rah da ki kor puhshilum ne JCB ban pynmadan ia ki jaka ba at bad ba thliw ne ban kynriah ia ki maw, ki dieng kiba la ieh bun snem harud u surok PWD, bad kynroh ruh ia ki jaka ba donkam ban kynroh, da ka jingia monjur lang u paitbah khamtam kiba shong iing sharud surok bad kane ka jingleh ka shnong ka long ka jingjop ia ki nongshong shnong khnang ban pynsuk ia ka iaid ka ieng ban kylluid ka surok ban iaid kali bad khamtam ka pynsuk ia ki paitbah ba iaid ba ieng lyngba une u surok. Ka shnong ka ai khublei ruh ia u MLA bah Lahkmen Rymbui uba la pynioh ia ki ia u surok wat lada tang khyndiat kilometers ruh, hynrei ka kyrpad ruh ia u ba un wad ki lad ki lynti ban pynioh shuh shuh ia u surok uba la jot mynta naduh Amlarem, Pdengshakap, Muktapur, Kharkhana shaduh Borghat, khnang ban pynsuk ia ka leit ka wan ka kit ka bah ki paitbah ka thain. Kumba lang ka thain ka pynmih shibun ki mar rep kum u kwai, tympew, ki soh, Sohmarit, Synsar bad kiwei kiwei de ki mar rep mar riang, ong u ma Ronal Shylla Waheh Shnong bad ma Duhlang Amrynsong General Secretary Shnong Kharkhana.
