Ka All Jaiñtia Muster Roll Workers & Labour Union, Central Executive Committee (CEC), Jowai mynta ka sngi saitjaiñ kala pynlong ïa ka jingïakynduh lang kum ka jingrakhe ia jingdap 9 snem ka seng ne ka ‘9th Annual General Meeting’ ha Madan Pohlyngdoh, Shangpung Pohchnong, ha kaba u myntri ba dei peit ïa ka tnad Food Civil Supplies & Consumer Affairs ma Comingone Ymbon ula long kum u kongsan.
Kane ka jingïakynduh jong ki nongtrei bylla sngi ki kynthup naduh ki nongtrei Muster Roll ha ki tnad sorkar bapher bapaher, ki nongshet Mid Day Meal, ki Misteri bad baroh ki nongbylla sngi kiba don hapoh ka East bad West Jaiñtia Hills District.
La seng ïa ka AJMW&LU naduh u snem 2016, kane ka seng ka ïeng ha ka nongrim ban dawa ïa ka hok jong baroh ki nongtrei bylla sngi ba kim dei ban duh ïa ka hok longbriew manbriew kaba ki dei hok ban ïoh na ka sorkar.
Na ka liang u kongsan ma Comingone Ymbon haba ai jingkren ula ïaroh ïa kane ka seng kaba la trei na ka bynta ka jingbha jingmiat jong ki para nongtrei bylla sngi, ula kyntu ruh kum ki nongtrei Muster Roll ki dei ban pyndep hok ïa ka kam ym tang ban hun ban ïoh ïaka pisa.
Ha ka juh ka por ula kyntu jur ban pynneh pynsah ïa ka mei mariang ban wanrah ïa ka jingjyrngam da kaba thung ïa ki tynrai dieng ha ki jaka ba la dep pom ïa ki dieng ki siej. “La kumno kumno lada pom ïa uwei u dieng dei ban thung bujli pat haduh 10 tylli ki dieng”, ong ma Ymbon.
Ïa ka jingïalang la pynïaid da ka kong Meri Shangpung (Vice President) bad la ïoh ruh ïa ki kyntien ai mynsiem na u Adviser bad u nongseng ka AJMW&LU u ma K.L. Parait, President of All Jaintia Mid-Day Meal Worker Union ma Jerry Anderson Suting la pynshong shit shuh shuh ïa kane ka sngi da ki jingrwai bad ki jingshad tynrai, ïa ki kyntien ai khublei la ïoh naka General Secretary kong Hunbeitki Dkhar bad hadien kane ka prokram la don sa ka jingïalang pyrkhat kam ha ka sien shong kaba ar.