Ki nongrep kiba hap hapoh ki kynhun bala khot ki Agroecolgy Learning Circle (ALC) kiba wan na ki shnong bapher bapher hapoh ka distrik West Jañtia hills kila wan ban ïashim bynta haka jingïapyninam symbai kaba la pynlong da ka SURE ryngkat bad ka NESFAS kaba la long mynta ka sngi haka shnong Sohmynting. Ha kane ka sngi kumba 56 jait ki symbai la wan rah da ki nongrep na ka shnong Sohmynting, 55 naka Community Seed Bank na ka shnong Mulum, na ka ALC na ka shnong Lumtrep kala wan rah 18 jait ki symbai, ka ALC na Larnai 11 jait bad Ksehrynchang 12 jait.
Ha ka jingkren lamkhmat kum u Shongknor jong ka jingïalang u Rev. Dr H.H.Mohrmen ula pynkynmaw ba ka pyrthei mynta ka ïakren shaphang kata ka organic farming pynban kane ka rukom rep ka dei kaba la don lypa ha ngi kumba la hikai da ki longshuwa jong ngi. Ula ong ba ka sorkar kala dei ban thaw polisi ba haka jaka ba ngin ong ba ngin sdang rep organic ngin ong ba ngi nangpynkhlañ ïa la rukom rep tynrai jong ngi. Ka rep tynrai ka dei ka spah kaba u longshuwa ula buh lypa ïa ngi bad ka por kala dei ba ngin phai dien biang sha kane ka jingstad tynrai.
U samla Ebor Langshiang uba long ruh research scholar kumjuh u Assistant Secretary jong ka Dorbar Shnong Sohmynting ula ïathuh shaphang ka spah ka mariang lyngba ki mar rep bad ki jhur khlaw kiba U Blei Trai Kynrad ula buh kyrpang ha ka shnong Sohmynting. Ula pynkynmaw ruh ba ka shnong Sohmynting ka don ïa ki jingthung kiba pawnam kiba mih na kane ka shnong kum ka Sohphlang bad u Sohlah Sohmynting bad ki soh kum u Salyngkiah kiba ki khot mynshuwa kum u Sohmynting.
U Pius Rani uba long u Executive Director jong ka NESFAS ula ong ba ba u sngewkmen bad ha une u snem ka NESFAS kala dap artad shiphew snem ka rta naduh ba la seng ïa ka bad ba kala nangkiew bad nangïaid shaphrang ha ka jingshakri jong ka ïa u paidbah nongrep jong ka jylla. Ula pynkynmaw ruh ba kane ka projek kaba kyrteng ka “Empowering Indigenous Community through Agroecology Learning Circle, for resilient, integrated and innovative natural resource management,” la bei pisa da ka World Bank lyngba ka jingkhmih jong ka Meghalaya Basin Management Agency. Ula ong ruh ba ki ALC ki dei ki rynsan ha kaba ki nongrep kin ïakynduh bad ïamir jingmut ban nangpynkhlañ ïa ka rep tynrai hapoh ki shnong ki thaw.
Haka jingkren pdiang u Rangbah Mynjurlang Langdoh Pyrtuh uba long u General Secretary ka Dorbar Shnong ula pynkynmaw ba ka shnong Sohmynting ka long kaba riewspah haka spah mariang ha kaba kala don lai tylli ki khlaw kyntang hapoh ka shnong kum ka khlaw Langdoh ka kur Pyrtuh, ka khlaw Kyntang ka kur Kyndait bad ka jong ka Kur Langshiang.
Ki nongrep kiba la ai jingkren ha kane ka jingïalang ki dei ka nong Nesly Shadap naka ALC naka shnong Larnai kaba la kren shaphang ka sboh wieh, ka kong Wanpoiri Shadap naka ALC naka shnong Lumtrep kaba la kren shaphang ka rukom rep Sying, ki jingeh kiba ki ïakynduh bad kumno ba ki jop ïa kine ki jingeh. Ka kong Roomika Pyrtuh naka ALC naka shnong Sohmynting kala kren shaphang ka rukom rep Sohphlang bad ka kong Rihun Sungoh naka ALC na Ksehrynchang kala kren shaphang ka rukom rep shriew saw. Naka liang jong ka SURE la ïa ka jingkren na u samla Waiphangki Shadap.
Ki ALC kiba napoh ka cluster kiba la ïadonlang hangne ki dei 6 tylli na Sohmynting, Ksehrynshang 4 tylli, Lumtrep 2 tylli bad na Larnai 2 tylli. Kiwei pat ki ALC kiba la wan ban ïashim bynta ha kane ka sngi ki dei ka ALC na ka shnong Mukhap, Iooksi bad kumjuh ki Community Facilitators na ki 20 tylli ki shnong kila ïadon ryngkat ha kane ka jingïalang. Khnang ba ïasam lem ïa ka khubor shaping kane ka projek la khot lang ruh ïa ki Village Organiser na ki shnong ba marjan kum na ka shnong Lumkhudung, na Phlongingkhaw. Ha kane ka sngi la ïadon lang ruh ki nonghikai bad ki khynnah skul na ka Demthring Presbyterian Sedcondary School bad kum ruh ki khynnah bad nonghikai na ka Secondary School ka Sohmynting.
