Hadien ka jingioh jingtip ba thikna ki Pulit ka East Jaintia, ha ka por kumba 12.30 shiteng synnia jong ka 15.11.2023, ba don uwei u briew u tip kyrteng kum u Manoj Muksor uba wan na ki thaiñ Silchar ban leit sha Khliehriat, ia uba la suba jur ba u wan rah lang bad ki tiar kiba long beaiñ. Kumta na ka liang ki pulit kila pynlong ka jingap shrip ia ki kali ba wan na katei ka thaiñ ha Lumshnong.
Kumta ha ba ki pulit ki la bat ia kawei ka taksi kamai kaba don ia u number ML-11 3594 kaba don ar ngut ki briew kynthup u nongniah. Haba ki pulit ki la pynlong ka jingkhynra ia ki tiar ki tar jong kine ki ar ngut kiba dei ia u Manoj Muksor bad Vicky Dkhar, ha kaba na ki pla jong u Manoj Muksor la lap 2 tylli ki synduk sabon kiba don ia u powder rong saw byrtem uba don ka jingkhia kaba 21 grams bad na ki pla jong uwei pat u Vicky Dkhar, ki pulit ki la kurup ïa 34 tylli ki klong barit ba la thep ia une hi u powder rongsaw byrtem ba khia 1.03 gram.
Hadien ka jingjurip bniah ia une u powder la lap ba u dei u drug Heroin, baroh kine powder ki la shong dor kumba 18 lak eiei. Kitei ki ar ngut kiba la shah kem ki dei kiba shong ba sah ha Mihmyntdu WJHD bad ka jingtohkit ia ki, ka dang iaid sha khmat.