Katba ki Pulit jong ka Jowai Police Station ki dang pynlong ia ka jingap pahara ha ka miet jong ka 16 bad 17 tarik mynta u bnai ha Lad Demthring, la wan iaid lynti 3 tylli ki kali ar shaka kawei ka motor bike bad ar tylli ki Scooty kiba la rung jubor ia ka jingker bad phet krad khlem treh ban sangeh wat la ki Pulit kila pyrshang ban pynsangeh ia ki.
Kumta la pynlong ia ki Pulit ban beh kthong ia kitei ki runar. Tang ha ka jingjngai kaba katto katne ki Pulit kila lap ia kitei ki 3 tylli ki kali arshaka, kiba la iehsah harud surokbah, katba ki nongniah pat kila phet krad shapoh khlaw.
Na ka liang jong ki Pulit kila pynlong ka jingkhynra sha ki jaka ba marjan bad kila ioh ban kem ia uwei u runar ba la suba donkti uba la tip kyrteng kum u Meshanki Langstang. La iathuh ba une u Meshanki u dei uba la ju mlien ha kine ki kam tuh bike la bun bun sien. Ia une u Meshanki la kem bad leit rah sha Jowai Police Station ban leh ia kaba donkam, la ong ki Pulit.
