U Lat ka jylla Meghalaya, C H Vijayashankar u la khot ïa ka jingïalang kaba kyrpang mynta ka sngi ha Raj Bhavan bad ki nongialam niam bad ki jaidbynriew bapher bapher ban pynpaw ïa ka jingïatylli hapoh ka sienjam Operation Sindoor jong ka ri India. U Lat u la kyntu ia ki dkhot jong baroh ki niam ha ka jylla ba kin iatrei lang ha ka jingiatylli bad ka jingkyrshan ia ka ri.
Ha kane ka jingïalang kaba la pynlong ha Raj Bhavan, Shillong, la sakhi ïa ka jingïashim bynta na ki nongmihkhmat jong ki katto katne ki niam ba kynthup ïa u Nabha Bhattacharya – Vice President ka Meghalaya All Faiths Forum bad u President ka Central Pooja Committee, Shillong, u Ellizer N Sangma – Pastor ka Garo Baptist Church, Rev GPL Gadew – Presbyterian Church, Shillong, Ganesh Dkhar – dkhot ka Seng Khasi, Sayidullah Nongrum – President ka Meghalaya Muslim Forum, Dr. Shngain Pyrbot – General Secretary, Seinraij, Shillong, Father Staibok Warjri na ka niam Catholic uba la wan mihkhmat ha ka jaka jong u Archbishop Victor Lyngdoh ki nongmihkhmat na ka balang Presbyterian ha ka thain Khasi Jaintia Hills, ka Garo Baptist Church, Ramakrishna Mission, bad ka Archdiocese jong ka Shillong. Ha kane ka jingialang la wan iashim bynta ruh da u Myntri Rangbah ka Jylla u Conrad K. Sangma ha ryngkat u Symbud Myntri Rangbah ka Jylla uba la iashim bynta lyngba ki lad digital namar ki dang don ha nongbah Delhi.
Haba kren sha ki nongialam niam bad ki nongialam ha ka imlang sahlang kiba la iawan iashim bynta, u Lat u la pynpaw ia ka jingsngewnguh kaba khraw ia ka jingwan jong ki ha kum kane ka jingkhot kaba kyrkieh. U la pynrem jur ia ki kam lehnoh, ha ri India bad ha ka pyrthei baroh kawei, bad u la iaroh ia ki nongialam na ka bynta ka jingkyrshan lang jong ki ia ka ri. Ha kine ki por kiba jynjar, u Lat u la iaroh ïa ka bynta kaba kongsan kaba ki nongïalam niam bad ki nongmihkhmat jong ka imlang sahlang ki shim ha kaba kyntiew ïa ka jingïatylli ha ka imlang sahlang bad ban pynneh ïa ka jingsuk. U la kyrpad ia uwei pa uwei u nongshong shnong, khlem da khein ia ka niam ne ka deiriti, ban ieng tylli ha kaba pynneh ia ki nongrim jong ka jingburom markylliang, ka jingieit ri, bad ka jinglong trai ri.
U Lat u la pynthikna ba la shim ia baroh ki lad ki lynti ban pynneh pynsah ia ka suk ka sain ha Meghalaya bad u la pynpaw biang ba ka bor jong ka India ka don ha ka jingiar jong ka bad ka jingngeit ha ka synshar paidbah, bad ba dei ban pynthikna ba ka jingiasuk ka long kaba kongsan tam. Ha kine ki por jong ka jingjynjar, ka long kaba kongsan ia baroh ki jaitbynriew ban iatrei lang, ban pynskhem biang ia ka jingngeit ha kajuh ka thong, bad ban iatreilang ban pynthikna ba ka imlang sahlang kaba iar jong ngi kan dang neh bad kan dang khlain shuh shuh.
U myntri sorkar ba dei peit ia ka tnad pule puthi, Rakkam A. Sangma u la ong ba ka ri ka dei jong baroh ki nong India bad da ka jingkyrshan jong ki paidbah, ka sorkar kan poi sha ka thong. U la kyntu ia ki nongiashim bynta ha kane ka jingialang ban duwai na ka bynta ki kynhun iada ri. U A.T. Mondal, Myntri ka tnad bording u la ong ba ym don jaka ha kane ka ri ia ki kam lehnoh.
Ha ka jingai jingkren jong u, u Chief Secretary ka Meghalaya Bah Donald Wahlang u la ban jur halor ka jingdonkam ia ka jingiatylli ha ka ri da kaba ong, “Ka dei ka ri kaba kongsan tam.” U la pynsngew ruh ia ka jingsngewnguh jong ka sorkar ia u Lat ka jylla bad ia baroh kiba la ia wan iashim bynta ha kane ka jingialang.
Baroh ki nongiashim bynta bad ki heh sorkar ki la pynrem lang ïa ka jingshah thombor ha Pahalgam bad ki ai ka jingkyrshan kaba khlem artatien ïa ki shipai jong ka ri na ka bynta ka jingpynphai kaba stet bad kaba thikna jong ki shipai India dang shen hapoh ka ‘Operation Sindoor’ ha kaba la ther ïa ki jingdon jingem jong ki lehnoh sha palat u pud u sam jong ka ri, kaba la ai ka jubab kaba khlain pyrshah ia kito kiba buh jingma ia ka shongsuk shongsain ha ri India.
Ki nongialam niam, da ka jingiatylli, ki la kular ban ai ka jingkyrshan ia ka sorkar pdeng bad pynpaw ia ka jingkyrmen ba ka shongsuk shongsain kan wan ha baroh kawei ka thain. Baroh ki dkhot ryngkat bad ki heh sorkar bad u Lat ki la pynpaw ia ka jingsngewlem ia kito kiba la duh ia la ka jingim ha kane ka jingshah thombor da kaba sngap jar ar minit.