Ia ka 6th Meghalaya Games kaba la sdang naduh ka 21 tarik ter ter mynta u bnai ha Nongbah Jowai bad Wahiajer la pynhap pyrda (pynkut noh) hynnin ka sngi 25/01/2025, ha Kiang Nangbah Stadium, Dongmihsngi, Jowai, ha kaba u ma Sniawbhalang Dhar, u Symbud Myntri Rangbah ka Jylla Meghalaya, u long u Kongsan.
Shwa ban ioh ia ka jingkren na u Kongsan (ma Sniawbhalang Dhar) bad pynhap pyrda, la lamkhmat da ka jingruwai jong ka Band-the LYNX, bud sa ka State Anthem, ka jingpynkup burom ia u Kongsan bad ia kiwei de ki Nongshah khot sngewbha bad ka jingkren pdiangsngewbha ia baroh da u bah John F, Kharshiing, Pressident ka Meghalaya Olympic Association bad bud sa ka Parade na ki Nongialehkai Sports (Parade of Athletes).
U ma Sniawbhalang Dhar haba kren ha kane ka sngi, u pynpaw ka jingkmen ka bakhraw wat ka suinbneng ruh ka iarap lang shit ruh em khriat ruh em ban pynlong ia kane ka 6th Meghalaya Games kaba jop ha Nongbah Jowai, West Jaintia Hills District. U ma Sniawbhalang, u ong ba haduh ka khyllipmat kaba u kren un shym la ioh ia kano kano ka Complain na ki Nongialehkai ha kaba iadei bad ka bam ka sa, ka shong ka sah ka thiah ka dem jong ki. “Ym lah ban len lehse ka don ka jingduna hangne hangtai ka jingbymlah ban pynbiang, hynrei pat ym shym la ioh ia kano kano ka complain bad haba ym ioh ka pyni ba ka jingpynkhreh ki bor pyniaid ia ka 6th Meghalaya Games ka biang nadong shadong bad ia kaba duna hangne hangtai yn thawlad pat ban pynbiang ha ka Meghalaya Games ka ban sawan.
Ha ka juh ka por u ma Sniawbhalang, u pynpaw ia ka jingsngewnguh ia ki bor pyniaid District bad ki Nongpyniaid ka State Meghalaya Games ba ym shym la don kano kano ka jingthud ia ki Nongialehkai. Haba phai sha ka liang ka Tranport Department u ong ba ka pynpoi ia ki Nongialehkai ha ka por kaba biang, na ka liang ki Pulit ki la shimkhia la ka kamram kaba la bynshet ha ki ba ym shym la don kano kano ka traffic jam kaba khanglad ia ki Bus kiba kit ia ki Nongialehkai ban pynpoi Ia ki Nongialehkai ba kin poi ha ka por kaba biang. Ha ka juh ka por u ma Sniawbhalang u pynpaw ia ka jingsngewnguh ia ki Rangbah shnong jong ka sor Jowai, Khliehtyrshi, Wahiajer bad ia kiwei de ki Rangbah shnong jong ka Rilum Jaintia kiba la iabahtymphalang ha kaba iashim bynta lang ha kaba pyniaid ia kane ka 6th Meghalaya Games kaba iaid beit iaid ryntih bad kiba pdiang sngewbha ia ki Nongialehkai haba ki wan ha ki shnong ki thaw jong ki.
Haba kren ia ki Nongialehkai u ong, ha ka jingialeh don kiba jop bad don kiba rem. Ia kiba jop u ong to nangpynbha bad practice shuh shuh bad ia kiba rem to nangiaid shaphrang ba phin jop ha ka 7th Meghalaya Games ka ban wan lane ha ka National Games jong ka Ri India kaba ngi khmihlynti ba kan wan ha ka Jylla Meghalaya ha ka snem 2027.
Ban pynkut ia ka jingkren u ma Sniawbha u ong ba ka jingpynlong ia ka Meghalaya Games khlem pep ka long kaba myntoi bad ka jingiasngew kum shipara hapdeng ki Samla Khasi, ki Jaintia bad ki Samla Garo bad ai ba kane ka jingiasngew shipara jong phi kan nangtehsong shuh shuh ha ki sngi bad ki por ki ban dangwan ha ka ban kyntiew ia ka Meghalaya ha ki kam ialehkai (Sports) bad ha kaba tei ia ka Meghalaya ba kan nangiaid shaphrang bad ka ban rah ia ka NAM bad ka burom hakhmat ka Ri India bad ha ka pyrthei hi baroh kawei.
Kham ha shwa la ioh ia ka jingkren na u ma Wailadmiki Shylla, Chairman jong ka MUDA uba long ruh u local MLA jong ka Jowai LA Constituency, ka jingsam ia ki Trophy sha ki Nongjop, ka jingpynhiar ia ka Lama jong ka 6th Meghalaya Games da u Kongsan bad kyntang iawai ka jingkren aikhublei (Vote of thanks) da u bah B.S. Sohliya,IAS, Deputy Commissioner ka West Jaintia Hills District.
Ha kane ka 6th Meghalaya Games ia ka nam Best team la ioh da ka East Khasi Hills District kaba la ioh 381 tylli ki Medal, ia ka nam 1st Runner’s Up la ioh da ka West Jaintia Hills, ka ba la ioh 108 tylli ki Medal bad ia ka nam 2nd Runner’s Up la ioh da ka Ri Bhoi District kaba ioh 104 tylli ki Medal kaba kynthup ia ki Gold, Silver bad Bronze medal.