Ka lehniam bad ka nohrong Behdeiñkhlam kaba shisien shisnem jong ka Raij Ialong, Raij Wahiajer bad Nongkhyllep da ka jingiarap ka suiñbneng shit ruh em slap ruh em ka la kut hynne ka sngi (07/08/2025) hapdeng ka jingiphuh iphieng ha kaba da ki hajar ki paidbah napoh ka Raij bad nabar ki la iawan ban sakhi ia kane ka lehniam bad nohrong Behdeiñkhlam ha Madan Aitnar jong ka shnong Ialong.
Katba ki Rong ki dang wan bad shwa ban ioh ia ka jingkren na u kongsan ma Sniawbhalang Dhar uba long ruh u Symbud Myntri Rangbah ka Jylla Meghalaya, la ioh shwa ia ka jingkren pdiang sngewbha ia u Symbub Myntri Rangbah, ia u local MLA ma Wailadminki Shylla, ia u MLA ka Mawhati ma Damanbait Lamare, ia u ma Chitlang Pale Ex. MLA, ma Moonlight Pariat Local MDC, u ma Marki Mulieh Ex-MDC, uba long ruh u Advicer jong ka Raij, u Doloi Puramon Kynjing, Doloi ka Elaka Jowai, ia u Superintendent of Police u Jagpal Sing Dhannoa, ia ki Kynrem ki Lyndan kiba la khot sngewbha bad ia ki paidbah da u ma Pyrkhat Shylla uba long u President jong ka Raij. Ha ka juh ka por u ma Pyrkhat u la ai ruh katto katne ki kyntien maitphang shaphang ka Behdeiñkhlam.
U ma Sniawbhalang Dhar uba long ruh Symbud Myntri Rangbah ka Jylla (Meghalaya) u long u kongsan. U ma Sniawbhalang haba kren ha kane ka sngi u pynpaw ia ka jingkmen ka ba khraw ba u la ioh ka lad ban ia don bad sakhi lang ia ka sngi pynkut bad nohrong ia ka Behdeiñklam jong ka Raij Ialong, kaba kynthup lang ia ka Raij Wahiajer bad Nongkhyllep. Nangta u ong ka jingwan jong u kam dei ka jingwan ban ia bun ktien, hynrei u wan ban ia sakhilang ia kane ka sngi Nohrong bad pynkut ia ka lehniam Behdeiñkhlam jong ka Raij bad ai ia ki kyntien kyrkhu kyrdoh ia ki khun ki hajar jong ka Raij Ialong, Raij Wahiajer bad Nongkhyllep.
Ha ka juh ka por u ma Sniawbhalang u la pynsngew ba la mang 24 klur tam ban pynbha ia ka Madan Aitnar bad u ong ba ha ka nohrong Behdeiñkhlam jong ka snem 2026 kane ka Madan Aitnar kan sa kylla rong da ka jingpynbha ia kane ka Madan Aitnar bad ki jaka shong jong ki paidbah sawdong kane ka Madan Aitnar.
Kham ha shwa la ioh ruh ia ka jingkren na u Symbud kongsan ma Wailadmiki Shylla uba dei ruh u local MLA bad u la pynkhamti ha u President jong ka Raij ma Pyrkhat Shylla ia ka Work Order kaba Shiphew lak tyngka na ka bynta ka iinghall jong ka Raij Ialong nalor kaba u la ai mynshwa Sanlak tyngka.
