Ka Dorbar Mang Tyngka jong ka Jaiñtia Hills Autonomous District Council (JHADC) kaba la long lai sngi lynter ïa kaba la sdang naduh ka sngi Balang 18 tarik kala poi noh sha kaba kut mynta ka sngi Thohdieng 20 tarik u Lber, 2026 ïa kane ka Dorbar la pynïaid da u shongknor ka JHADC u Dr. Sankey Shangpung.
Haba pynkut ïa ka Dorbar la pdiang bad mynjur ïaka Mang Tyngka jong u snem 2026-2027 kaba kot ïaka jingpyllut kaba haduh T.309,26,80,500/- tyngka, katba ka jingïoh ka Council ka long T.293,64,42,000/- tyngka bad kane kala paw ba ka jingpyllut ka heh ban ïa ka jingïoh haduh T.15,62,38,500/- (khadsan klur hynriewphew ar lak laiphew phra hajar san spah) tyngka.
Na ka bynta ki tnad treikam bapher bapher hapoh ka JHADC la bhah naka jingpyllut baroh naduh ka jingmih naka Council bad ka bhah ba ïoh naka Sorkar kaba long ïaka General Administration T.13,26,96,400/-, Finance & Accounts T.37,05,67,100/-, Land Revenue & Land Reform T.11,34,99,200/-, Land Record & Land Settlement T.12,58,18,300/-, Taxation T.5,52,08,500/-, Forest T.14,79,36,300/-, Political Department: T.5,56,70,600/-, Civil Work T.144,12,21,300/-, Education T.26,30,29,600/-, Art and Cultural T.2,41,97,700/-, Market: T.20,11,79,300/-, Statistics and Information T.1,67,01,800/-, Stationary & Printing T.1,47,36,100/-, Planning T.1,27,67,900/-, Judicial T.3,37,35,900/-, Legislative T.6,80,69,600/-, Village and Town Administration T.1.56,44,900/-.
Hashwa ban mynjur ïaka Mang Tyngka la don ki Cut Motion kiba la wanrah da ki MDC ka liang pyrshah halor ki jingbymshai bad ban pynduna ïa ki jinglut jingsep kiba ym shem ïahap satia ban pynlut ha ki katto katne tylli ki tnad treikam.
Haba pynshai ïaki na ka liang ki EM kiba dei peit ïa ki tnad treikam kila jubab ïaki jingdonkam kiba ka EC ka dei ban leh, khnang ban pynïaid shakhmat ïa ki kam ka Council bad la pynshai ruh ki don ruh ki bynta kiba ka EC ka hap ban shong pyrkhat sani ïa kitei ki kam, hadien kane na ka liang kitei ki MDC ba wanrah Cut Motion kiba weng noh ïa ki.
Ha kane ka sngi la wanrah ruh ïa ka ain “The Jaiñtia Hills Autonomous District Council (Trading by Non-Tribal) (Amendment) Rules, 2023” na ka liang ka ïong Dorbar ka mynjur ïa ka bad la rai ban phah sha ka sorkar ban leh ïa kaba donkam.
