Ka Jaiñtia Hills District Chess Association (JHDCA) ha kane ka sngi saitjaiñ 8 tarik u Jylliew kala pynkut ïaka jingïalehkai Chess bala tip kum ka Jaiñtia Hills District Chess Competition cum State ‘B’ Tournament, 2024 bala pynlong ha Thomas Jones Synod College, Jowai.
Ha ka sngi sdang 7 tarik la ïoh ka jingkren pdiang da u ma P. Lhuid President Jaiñtia Hills District Chess Association, na u K. M Warjri President Meghalaya Chess Association bad na u kongsan ma Teiwanza Challam uba la ai mynsiem ïa baroh ki nongïalehkai Chess ba kin long kiba trei shitom bad ban ïalehkai bha haki jingïakop bad kumjuh na ka bynta ka State Championship.
Kila don 93 kiba wan ban ïashim bynta ha kane ka jingïalehkai Chess kiba dei napoh ka West bad East Jaiñtia Hills District bad kumba 37 ngut ki dei ki khynnah skul.
Katba ha kane ka sngi pynkut jong ka 18 tarik u District Sports Officer ka West Jaiñtia Hills, u ma K. Passah ula long kum u kongsan. Ha ka jingkren ula ai khublei ïa ka JHDCA kaba la pynlong ïa kane ka lympung ïalehkai Chess ban pynproh shuh shuh ïa ka jabieng ki nongïashim bynta.Ula kyntu ïa ki kmie ki kpa ba kin pynshlur ïala ki khun jong ki haka kam ïalehkai chess bad ban ïashim bynta ha kino kino ki lympung ïalehkai Chess.
Ki nongjop ha ka open category ki long u Roben Suting, u Dapmon Bang, u Elangki Rymbai. Ha ka Under 17 Category ki long u Zephaniah R Dkhar, u Braxton Ryan Lamare bad u Leon Raymond Rymbai.
La sam ruh ïa ka khusnam sha kito ki nongïashim bynta kiba la heh ka rta bad ka khusnam ba kyrpang sha kiba rit haka rta hapoh ka Under-13 kiba don 13 ngut bad ïa ki 2 ngut ki khynthei kiba wan ïashim bynta ha kane ka jingïakop.
La pyntip ba ki don haduh 11 ngut ki nongïalehkai chess kiba la biang bha ha ka jingïoh jinghikai bad ki lah ruh ban long ki nongjop ha kine ki sngi ban wan.
Ha kane ka jingïakop la jied ïa ki hynriew (6) ngut ki nongïalehkai ki ban mihkhmat ïaka District sha ka State Championship ka ban long haka 12th tarik haduh 15th tarik u June 2024 ka nongbah Tura.
