Hadien ba ka Raij ka la pyndep ia ka kñia Ryngkaw, kñia Syiem Duwan, Nohsakyriat kaba la sdang naduh ka 25 tarik ka la kut ha 26/04/2025 da ka Shad Sukra kaba la sdang na Madan Ryngkaw bad iaid shad sha baroh ki dong ki kyntoit shnong jong ka shnong Ialong.
Ka shad sukra la ong ba kam don bynta ei ei bad ka niam ka shu long ka jingshad lehkmen jong ka Raij kaba shisien shisnem hadien ka kñia Ryngkaw bad Nohsakyriat ha shwa ba ki khun jong ka Raij kin bet kin thung ia u Kba ha ki Hali ki Pynthor jong ki. Ka shad Sukra jong ka Raij mynta ka snem ka long kaba phuh baphieng haba ianujor bad ki snem kiba la leit noh. Ka jingrang ka suiñbneng ka khring da ki hajar ngut ki Nongwan peitkai na ki shnong ba marjan, nalor ki khun ki hajar jong ka Raij. Ki kynthei ha ka riam Ryndia, Muka, Kpieng Ksiar, Kpieng Paila, ki shynrang pat jlis da ka Phali ka JaiñSpong bad kpieng Ksiar kpeing rupa la kum ki Syiem ki Partsha. Ka Shad Sukra ka dei ka jingshad rong sngewbha, ka jingshad pyni rong ha khmat ka pyrthei ia ka riam ka beit, ka kup ka phong tynrai ka jait bynriew ha khmat ka pyrthei.
Ha shwa ban sdang ka jingshad Sukra la pynlong ia ka jingialang kaba lyngkot, kaba la pyniaid da u President jong ka Raij ma Pyrkhat Shylla, ha kaba u ma Wailadmiki Shylla, MLA u long u Kongsan bad u ma Chitlang Pale, Ex-MLA u Symbud Kongsan.
U ma Wailadmiki Shylla haba kren ha kane ka sngi u pynpaw ia ka jingkmen kaba khraw ban ioh ka lad ban iadon lang bad ban ia sakhi lang ia kane ka shad Sukra kaba phuh kaba phieng jong ka Raij. U ai khublei ia ki Nongkitkam jong ka Raij bad ia baroh kito kiba iadonkti lang ha kaba pynlong ia kane ka shad Sukra kaba phuh kaba phieng jong ka Raij kaba nang phuh na kawei ka snem sha kawei ka snem. Nangta u ma Wailad u ong ka Shad Sukra ka dei ka wei na ki Culture jong ka Raij bad ka jaitbynriew kaba la saiñdur da ki longshwa man shwa bad ka dei ka shad rong sngewbha kaba long ruh kawei na ki lad ban ia kynduh lang ki khun jong ka Raij shisien shisnem kiba na jan bad na jngai bad kyntu ba kum kawei na ki Culture dei ban pynneh pynsah ia ka katba dangsah kane ka jait bynriew ha kaba ka sla pyrthei bad u kyntu ia ki khun ki hajar jong ka Raij ban nang pynbha bad pynwadur shuh shuh ba kan nangphuh nangphieng ha ki snem bad ki por ki ban dang wan ba kan nang khring shuh shuh ia ki Nongwan peitkai ym tang napoh ka Raij, na ki shnong kiba marjan hynrei wat ia kiba napoh ka ri India bad nabar.
U ma Wailad ban nang pynbha shuh shuh ia ka madan Shad Sukra, ia ka ïing jong ka Sein Raij Ialong-Wahiajer ula pynnoh Rs.10,00,000/- (Shiphew Lak tyngka).
Ha kane ka sngi la ioh ia ka jingshad na ka Seiñ Khynroo-Khyllood ka Seiñ Raij Ialong, ka shad Culture na ka Khilieh Shnong, na ka Mulang, ka Shad Arngut na Khliehphyrnap, ka shad Culture na Wahiajer, na Luti Tuber, na ka Seiñ Kur Pale, na ka SHT Committee, ka shad khynnah na Khliehphyrnap, ka shad Culture na ka Seiñ Raij Nongkhyllep, na ka shnong Nongthymme, na ka Lumtarian bad ka shad Arngut na Khliehshnong ka Ialong.
La nangpynkhraw ia kane ka sngi da ka jingiadonlang u Dalloi Elaka Jowai, Daloi Puramon Kynjing, ma Marki Mulieh, Ex-MDC, JHADC, u Langdoh ka Raij Ialong, ki kynrem ki lyndan jong ka Raij bad kiwei de ki riew khmat kiba la shah khot sngewbha.
