Kum shibynta ban kyntiew ia ka ioh ka kot jong ki Self-Help Group (SHGs), ka Jaintia Hills Development Society (JHDS) ryngkat ka jingiatreilang bad ka Ophis jong u Deputy Commissioner ka West Jaintia Hills District ka la pynlong ia ka Jingai jinghikai ba 15 sngi halor ka kam Shna Sabon bad Shna jingbam.
Ia kane ka Training prokram la plie pyrda naduh ka 17th October bad la pynkut mynta ka sngi kata 1st November 2022.
Ha kane ka sngi ba kut jong kane ka prokram, la don ka theory bad practical exam kaba la sdang naduh ka por 10 baje mynstep. Ha ka por janmiet la don ka cultural prokram ba la pyniaid da i Kong Ridu-I Passah. Ha kane ka cultural prokram la iohi ia ki jingshad tynrai bad ki drama ba la iashimbynta da ki nongshah hikai.
Ha kane ka sngi pynhap pyrda la ioh ruh ia ki jingkren aimynsiem na u Fr. Manbha Pakem, uba long u Director ka Jaintia Hills Development Society (JHDS), kumjuh ruh na ka Kong Wanmon Tang kaba dei ka Master Trainer, food Processing bad na u bah Macsal Jones Nongsiej, Master trainer ka Soap Making.
Baroh lai ngut ki nongkren ki la aimynsiem ia ki nongiashimbynta ba kidei ban sdang noh la ka jong ka kam ym ban shu pynlehnohei ia ki jinghikai ba ki la ioh. Ki nongshah hikai ha kane ka jingai jinghikai ba 15 sngi ki kynthup ia ki samla bad longkmie kiba na ki shnong, Khlookynring, Shangpung Khliehrangnah, Mynska, Saphai, Thadmuthlong, bad Mustem.
