Ka Shillong Lajong FC mynta ka sngi ka 26 tarik Nailar ka la liem noh ha ka sien ba nyngkong mynta ka samoi ha ka jingiakhun jong ka lympung Durand Cup.
Ha kane ka jingiakhun ka North East United FC ka la pynliem ia ka Lajong da 3-0 kol.
Ki paidbah nongkyrshan ka Lajong kiba la kyrshan radbah naduh ba sdang kane ka samoi ïalehkai ki la diaw shibun namar ba ki la liem noh ka jingiakhun ha la ïing.
Kaba kham pyndiaw bad kham pynkhluit kadei ia ki nongkyrshan kiba khlem ioh tiket ha kane ka jingiakhun semi final namar ym dei tang na sor kiba angnud ban ioh sakhi ia kane ka lympung kaba heh hynrei kiba na nongkyndong ruh.
Haduh 6000 la buh tiket khnang na ka bynta ki nongkyrshan ka North East, kumta na kane ka rukom pyniaid la nang pynkhluit shuh shuh ia ki nongkyrshan kiba na kane ka jylla namar tang 9000 tam kin ioh tiket ki trai shnong.
Halor kane, bun ki paidbah ki la angnud ba ka Sorkar jylla kan pynioh noh ia ka stadium kaba lah ban pynrung briew kumba 60,000 tam namar kane ka jylla kadei ka jylla kaba ieit phutbol.
Haba phai pat sha ka jingialehkai, naduh ba sdang ka kyll step, ka Lajong ka la pyrshang ban wad ki lad ban ioh pynkhih jar hynrei namar ka jingskhem ki rangialehkai ‘dien ka North East, ki khlem ioh shuh ia ki kabu. Tang ha ka minit ba 13 ka North East ka la ioh ban thep shikol lyngba uThoi, ia ka kol ba ar la ioh ban thep da u Ajaraie ha ka minit 33 katba ia ka kol ba lai la thep da u rangialehkai ka Assam, u Parthib Gogoi ha ka minit ba 90+3.
Lyngba kane ka jingjop ka North East ka la ioh ban jam nyngkong sha ka final jong kane ka lympung mynta ka aïom.