San tylli ki mat ba ka JSU Seng Kmie ka lah wanrah ha ka jingiakren bad iathir ha shuwa ka sorkar kan pynbeit u pud u sam hapdeng ka jylla Meghalaya-Assam, ba lah khot da ka sorkar jylla ha ka sngi ba lah dep ha Secretariat, Shillong.
Kine ki mat ki long ban kynthup lang ia ki Nongsynshar Shnong, Elaka, Hima ki Raij bad ki Syiem bad ki District Council hapoh ka Regional Committe jong ka sorkar.
Kaba ar ka long ba ka sorkar ka dei ban lum bha ia ki kot ki sla bad peit bniah ia ki shuwa ban pynbeit pud khnang ban lait na ka jingbakla.
Ka ba lai ka seng ka la ai jingmut ia ka District Council lyngba ka sorkar jylla ba dei ban jied ne buh biang ia u Dalloi jong ka Labang- Nongphyllut Elaka kaba lah jah noh ha ki snem ba mynshuwa bad mynta bun kine ki shnong ki hap shapoh ka Block 1.
Kaba saw na ki mat ka long ba ka seng ka la ai jingmut ruh ia ka sorkar jylla da ka ba ai da ka dorkhas ka ba rim sha u Home Secretary ka sorkar jylla bad dei ban buh ia ka Police Outpost haka shnong Mukroh namar naduh u snem 2015 la dep ban dawa ia ka juh bad haduh mynta ka sorkar kam pat leh eiei.
Ka mat jingdawa ba san ka long ba ka seng ka la dawa ba dei ban buh ia ka Police Outpost ha Mukhroh kan myntoi shibun ia ki nongshong shnong namar ki Pulit na West Karbi Anglong ki pyndik shibun ia ki nongshong shnong ba sah sha khappud.