Ki kynhun nongrep ha rud wah Umngot mynta ka sngi ki la pynlong ia ka jingialang paitbah da kajuh ka sur ki ieng ban iai pyrshah tad haduh ba kin da ioh da ka jingthoh ha kti na ka sorkar ba ia ka Umngot Hydro Electric Project lah pynduh pyndam noh ia ka.
Ki nongrep ki pynpaw ba kane ka jingthmu jong ka sorkar ban den um pynmih bording kan ktah jur iaki hajar ngut ki nongrep ka thaiñ bad kiba kamai jakpoh na ka tourism lada den ia ka Wah Umngot. Ka jingialang paitbah kaba heh bha lah pynlong ha ka shnong Mynsang kaba don ha Mawkynrew Block bad kaba don hajan ka wah Umngot, ha kane ka jingialang paitbah lah ia donlang ki nongialam jong ka JAC Against Unngot Hydro Electric Project bad kynthup lang ia ki nongialam sengbhalang ka KSU, JSU, FKJGP, HNYF, TUR bad ka Meghalaya Rural Tourism Forum.
Ha kane ka jingialang la don lang ki nongsynshar shnong na baroh ki shnong kiba don shi lynter ka Wah Umngot bad ki nongsynshar bad nongialam shnong na ka Elaka Darrang. Ha kane ka jingialang lah mih ka sur na u paitbah bad ki la ia pyrta lang baroh da kaba ong “Ban den ia ka Wah Umngot, Ngi pyshah” bad baroh ki nongkren kiba kynthup i bah Shemphanghun Mukhim (Secretary JAC), kumjuh na ki nongrep, ki nongialam sengbhalang naduh ka FKJGP, JSU, KSU, TUR, bad na u Sordar Shnong Shnongpdeng bad u Dolloi ka Elaka Darrang bah Pyrwa Lymba.
Ia ka jingialang la pyniaid da u bah Phyrnailang Marboh (Vice President kynhun nongrep ha rud wah Umngot).
