Amlarem: Ka JSU War Jaintia Circle hadien ka jingud ki ba bun na ki nongkhaii maw bad nongniah kali ka Ri War Jaintia ka la pynpaw ba ki Weighbridge ba la pyntreikam da ka tnad Transport ka Sorkar Meghalaya ba ki dei tang ki khyrdop shna pisa ki heh ka Sorkar ha ka ba ki la shim kabu ia ka jingkit palat pud ki trok kit Mawshun bad Boulder sha Ri Bangladesh namar katkum ka hukum Sorkar ka ai lad tang 12 ton kawei ka trok.
Ka JSU ka la kynnoh ba kawei pa kawei ka trok ki hap ban iaid lyngba ka Weighbridge ha kaba lah buh ryngkat ia ki briew Sorkar (Enforcement Inspector). Ha kaba iadei bad ka Amsarim Weighbridge kaba hap ha ka jingkhmih u bah Paswet uba dei u Enforcement Inspector ha kane ka weighbridge la tip ba 1000 tyngka ki trok ki hap ban siew tam nalor ka 200 tyngka ba kidei ban siew sha Sorkar ryngkat ka slip ban ioh ban iaid beit lyngba kane ka weighbridge. Na kane ka 1000 tyngka 500 tyngka ka dei ka bhah jong ki nongtrei Enforcement ka Amsarim kiba dawa na ki nongniah trok kawei pa kawei.
Kane ka jingshimkabu ki briew Sorkar ka la pynlong ia kiba bun ki nongkhaii maw ban iapnong ha kaba ka dor u maw kam iahap shuh bad ka bai lutsan ban tih bad khaïi ia u. Ka JSU ka pynsngew ba bun ki jinglutsan ki la leit sha ka pla shimet ki briew sorkar ha kaba bun eh ka jingsiew kadei ha ki weighbridge nalor ki jinglut kum ka bai maw, bai umphniang, bai kali, bai driver, bai challan bad kiwei kiwei khamtam namar ka dor die ia u maw sha Bangladesh kadei kaba rit.
U President ka JSU War Jaintia Circle u samla Eddy Kery Pohtam u la ong ba ka kam khaïi mawshun ha kaba nujor bad ki snem ba la dep kata ha ki snem shuwa ka 2016 shuwa ban mih ki weighbridge (kiba la khein beaiñ ruh da ka Sorkar pdeng) bad kiwei pat ki khyrdop khrong pisa ki tnad Sorkar kane ka kam khaïi mawshun ka la long kaba wanrah jingmyntoi shibun ia ki ba trei bad im ja na kane. Hynrei mynta pat ka la long kaba eh bha bad mynta hi ka wanrah jingmyntoi sa tang ia ki heh Sorkar ki ba bam suk ia ka um syep kiba trei shitom ha kane ka kam.