Hato phi la ju ïohsngew ka jingjia ba ka District Tourism Officer kan kylla long ka nongwan jngohkai pyrthei (tourist) hala ka jong ka District? Kaba kum kane kam ju jia koit, hynrei kala jia tang mynta hi ka sngi ha ka shnong Nartiang.
Hadien bala sam ïa ki syrnot bad ki batch ban pynshisha ïa ka jingpyndep jong ki ïa ka training kum ki guide ha ka shnong Nartiang, kine kiba pyndep training ha ryngkat ka jingïatreilang jong ki nongtrei jong ka Society for Urban and Rural Empowerment (SURE) kila ïalam ïa ka S.D. Shylla, District Tourism Officer bad u Lambourmi Suchen, District Skill Development Officer ka West Jaiñtia Hills sha ka kper mawbynna ban batai ïa ki shaphang ka jingkongsan jong kine ki mawbynna bad hadien kila ïalam ïa kine ki ar ngut ki sahep sorkar sa sha ka Ma Jayantee Temple kaba don ha kane hi ka shnong. Ka kong Shylla bad u ma Suchen ki ïaroh ïa ka jingtbit jong kine ki samla ban batai shaphang kine ki jingbuh jingsat u mynbarim kiba don ha kane ka shnong.
Kumba shu pynkynmaw ka SURE da ka jingkyrshan bad ïarap ki artylli ki tnat sorkar ka District Tourism Officer bad u Districk Skill Development Officer kala ai jinghikai ïa ki arphew ngut ki samla na kane ka shnong ha kaba ïadei bad ka kam kumno ba kin trei kum ki guide ban ïarap ïa ki tourist kiba wan jngohkai sha ka shnong Nartiang. Haduh mynta haba ki tourist ki wan sha kane ka shnong ym ju don satia ki nongbatai ïa ki, kumta nangta shakhmat kine ki samla kin sdang ban shim ïa kane ka kam.
Ha ka jingkren jong ka Tourism Officer kala ong ba ka Nartiang ka dei kaba donbok ha kaba ka don ïa ki jingïohpateng (heritage) bad kumjuh ruh ïa ki temple kiba lah ban kyntiew ïa ka kam pilgrimage tourism. Kala pynkynmaw ruh ïa ki samla ba ki guide ki dei kum ki khmat jong ki tourist bad ki dei ban khmih bha ruh ïa ka jingshngaiñ (safety bad ka security) jong ki tourists. Kala ban jur ïa ka shnong bad kumjuh ruh ïa ki guide ba ki dei ban pynlong ïa ka shnong kaba khuid namar ka khuid ka suba ka dei ka kongsan ha kaban khring ïa ki nongwan jngoh kai pyrthei.
U ma Lambormi Suchen ula ïaroh ïa ka shnong hapoh ka jingïalam jong u Waheh Chnong u C. Myria ba kala ai ka jingkyrshan ïa ki office ban pynlong ïa kane ka training. Ula kyntu ruh ïa ki samla ba kin pyndonkam hok ïa jinghikai kaba kila ïoh khnang bad kan long ka lad ïohkam ïohjam ïa ki. Haka jingkren jong u Waheh Chnong u kyrmen bad ka jingïatreilang hapdeng kine ki tnat sorkar kan nang khlaiñ khnang ba ka shnong kan nangroi nangpar.
U Dr H.H. Mohrmen ula pynpaw ba ula don ka jingïadei kaba jan bha bad kane ka shnong naduh ki por kiba mynshuwa bad ka jingaitraining ïa ki samla ka dei kawei na ki jingangnud ka jong u. Ula ong ruh ba u sngewkmen ba tip ba kine ki samla kila sdang ban ïoh guide tang hadien katto katne sngi bala dep ai training ïa ki. Kiwei pat kiba la ai jingkren ki dei ka kong Niwanka Shylla Project Coordinator SURE bad ka kong Luminary Liam bad ïa ka jingïalang la pynïaid da ka Sliang Suting na ka SURE.
