Da u, Chandame Sungoh. Chutwakhu, Jowai
Kane ka Nan lane ka Pung ka don hapdeng jong ka sor Jowai markhap ka Office jong u Deputy Commissioner West Jaiñtia Hills District bad ka ïingmane jong ka Balang Unitarian Jowai, harud jong ka surok bah National Highway Jowai Amlarem Dawki. Kumba ka sor Jowai kadei ka ïitkhmih jong ka Ri Jaiñtia te kane ka nan ruh kumjuh hi.
Kane ka jaka bad kane ka Nan ka dei jong ka Kur Dkhar Jowai hynrei daka jingïa sngewthuh jingmut bad daka jingkular bad sumar bad pynkhuid te kila ai noh sha ka Districts Administration jong ka West Jaiñtia Hills District. Hajan jong kane ka nan ka don ruh ka park lane ka jaka shongkai kaba ka seiñ kur Dkhar kala aiti ban pynïaid daka State Forest Department jong ka West Jaiñtia Hills District. Bad ka don ruh saka jaka thang sati (jaka thang briew) jong ka seiñ kur Dkhar hi.
Narud jong ka surok bah National Highway naduh na DC Office, lad SP Office bad Standwar la ker skhem bha ha kaba ki nongïaid lynti ki shem jingeh ban bret wat tang i synduk jingpruid ruh. Naliang ïingmane Unitarian bad naliang park ruh ka don ka jingker bad nalor ka jingker ki don ruh ki nongpeit lane ki mali kiba peit bad sumar ïakane ka park bad mynmiet pat u don u chowkider u ba ap bad peit ïakane ka park bad kane ka nan hi. Haka jingshisha kane ka nan ka dei ban long kaba khuid bad ka um jong ka kadei ban long kaba sngur, hynrei kumba ngi la ïoh-i lang baroh te ka um jong ka ka long thik kum ka septic tank lane ka jaka pyllang um jakhlia.
Haka jinglap bad jingpeit jong nga ki don ar tylli ki daw bah kiba pyntngit pyn jakhlia ïaka um jong kane ka nan, kawei ka dei naka jingtuid jong ka um naki dukan kiba don ha Standwar khamtam eh ki dukan ja dukan sha bad ka lah ruh ban long naki ïingbriew hi kiba don hakane ka dong ka kyntoid. Nangta naka wei ka Hostel kaba don hajan eh jong kane ka nan, kane ka nan ka lah ban dei kaba pynïaid daka Balang Unitarian hi. Ngi ïoh i ïaka rukom kylla rong jong kane ka um ruh ka long lati daka phniang ka khleiñ kum ka um sait tiar um saitjain. Kumta, khlem artatien ka daw jong ka jing jakhlia kane ka nan ka dei naka jingtuid jong ka um sait jain um sait tiar jong kine ki jaka.
Ka jingheh jong kane ka nan kam duna ïaka saw hajar lane san hajar square feet antad, ka jingjylliew ruh kam duna hynriew lane hynñiew phut bad ki don ruh shibun bah ki dohkha haka. Ki briew kiba juh wan kai hakane ka park kane ka nan ki shait bret jingbam kum u shana muri lane ki popcorn kiba per hasla um ban ïoh peit ïaki dohkha. Ki dohkha ruh i bang bha ki ïamih ki ba rit nalor nalor bad kiba kham heh na shapoh baki ïaknieh bam. Tharai kidon daki phew quintal hi ki dohkha hapoh kane nan. Hynrei kaba sngewsih kalong ba kine ki dohkha ki lah ban ïap namarba ki dohkha ruh kim lah ban im lada tngit lane jakhlia palat ka um.
Ha kawei ka sngi katba nga dang shong kai bad pule kot khubor, wan lai ngut ki Tourists napoh Haryana kine ruh ki peit kai ïaka jingmih ki dohkha badon kiba bret popcorn hakata ka por. Kine ki Tourist ki ïakren para maki bad ong, “Jin lada ka um jong kane ka nan ka long kaba khuid bad sngur te kan kham i tynnad shuh kane ka jaka, wat lada ka long ka pung kaba rit ruh lada khuid te kadon ka jing i tynnad kumba ki ong, Small is beautiful haka ktien phareng” Nga dang mut ban ïakren bad ki, hynrei nga lehraiñ haba ki briew kiba nabar ki ïoh ban kren beiñ ïangi.
Kumta, dakane ka jingthoh nga kyntu bad kyrpad ïaki ba dei peit lane ki ba dei trai jong kane ka nan ba kin sngewbha ban shimkhia ban wad ki lad ki lynti ban pynkhuid ïaka. Lada ka um ka khuid te ki dohkha ruh kin im kin shait kin khlaiñ bad lah ban kem ban die ïa kine ki dohkha bad ruh ban pynlong daka ïakob khwai ban pynmih pisa.
Ki trai ïing, ki nongpynïaid jong kane ka Hostel Unitarian bad ki dukan badon ha Standwar ruh kim dei ban pyntuid ïa ki jaboh jabaiñ lane ka um jakhlia sha kane ka nan khnang ba kan long kaba khuid bad kaba i tynnad. Kiba dei trai bad ba dei peit ïaka ki dei ban pyrkhing bad ymdei shuh ban shah ïa kine trai Hostel ki trai ïing trai dukan ba kin pyntuid ïa ki um jakhlia sha kane ka nan.
