Ka KSU Laban Circle mynnin ka janmiet 29 tarik u Nailar, 2025 ka la ïeng ap pahara ha kylleng sawdong ka thaiñ Riat Laban Dorbar Pyllun ban peit pyrman bad talasi ïa ka jingrung jingmih jong ki mynder napoh kane ka thaiñ. Ki dkhot jong ka Seng ki la ap ha Red Cross, Iewdak ba hap ha Dorbar Laban, Mynsiañ Ranab ba hap ha Dorbar Lower Lumparing, Cliford Nongrum Road ba hap ha Dorbar KOR bad ha Taxi Point ba hap hapoh Dorbar Shnong Lumshatsngi.
Kane ka jingap pahara ka sdang naduh 4 baje haduh 9 baje janmiet bad ka daw ba ka Seng ka ïeng ap pahara ha surok syngkieng bad naduh 4 haduh 9 baje janmiet ka long ban lah ban bat ïa ki mynder namar dei ha kum kane ka por ba ki ju mih na ka jingbylla ka jong ki ne wanphai ban sah ha ki iingwai jong ki sha Laban.
Ha kane ka jingap pahara na ka liang sa Seng ka la ioh bat ïa 58 ngut ki bar jylla bad na kine 22 ngut kim don kot eiei ruh ban pynshisha ïalade. Na ka liang ka Seng ka lap ba bun ngut na kine ki bar jylla ki dei ki khar muslim kiba wan phet wir na Assam bad kiwei ki jylla bad ki ioh sah ïing wai ha Laban khlem pyntip ïa ki Dorbar Shnong bad kine ki muslim kiba shong ba sah ha Laban bad Lower Lumparing hi kiba ai jaka rieh jaka sah ïa kum kine ki khar muslim kiba phet wir. Kane ka la pynlong ïa ka Seng ba kan hiar ban leit sha ka Three Pine Colony (Laban) ba don kumba 80-100 tylli ki longïing muslim bad hangne ka la lap ba bun ngut ki longïing ki ai jaka sah ïa kine ki khar muslim ba phet wir. Na ka liang ka Seng ka la ioh ban beh noh ïa kine ki briew bad la aiti ïa ki sha ka Laban Police Station.
Ka Seng lyngba kane ka kyrwoh ka kwah ban ai ka jingmaham kaba tyngeh sha baroh ki nongshong shnong jong ka thaiñ Laban la kidei ki Khasi, ne bym dei Khasi ne ki khar muslim ba kim bit ban ai wai sha ïa ki khar muslim kiba phet wir na Assam bad na kiwei ki jylla bad ha kajuh ka por ka Seng ka maham ruh ïa ki nongialam niam ha ki Masjid ne ki Mosque ba kim dei ban ai jaka rieh ne pynshlur ïa ki para muslim ba ki dei ban ai jaka rieh ïa ki muslim.
Ka Seng ka pyntikna ba kum kine ki jingkhynra kin dang ïai bteng bad lada dang lap nangne shakhmat ka Seng kan ai jingsneng da kaba tyngeh.
Kane ka long katkum ka kyrwoh ba la phah da u Jason Laloo, General Secretary, KSU Laban Circle.
