Ki nongshong Shnong jong ka Shnong Kharkhana, Pasadwar kiba hap hapoh ka Amlarem Block, West Jaintia Hills bad ka shnong Borghat ha East Jaintia ki dap da ka jingtieng bad syier mynsiem tang shu wan ka aiom Lyiur namar kine ki Shnong ki Don hajan ka wah myntdu (Tisang) namar lada shlei kane ka wah ka don ka jingktah shibun ia ki nongshong shnong khamtam kito kiba shong iing harud surok namar ka jingkiew kynsan ka um ka pynsniew bad pynjot ia ki jingdon jingem bad jongthung jingtep baroh kat kaba ka um ka Iaid lynti.
Na ka liang jong ki nongshong shnong ki kyrpad ia ka tnat trei kam ka sorkar jylla kaba peit ia kane ka bynta ban phai lem ki khmat jingiarap khnang ba kin lait na ka jingkhuslai mynsiem namar ki briew sha kane ka thaiñ kim nang ioh thiah shuh mynmiet tang shu poi ka aiom Lyiur. Ki nongshong shnong kila bun kam ha ka ban lum ban lang ia ki tiar ki tar nalor nangta sa ki lieng ba don ha ka wah ki hap ban peit bad sumar man ka por namar ki pyndonkam ia ki lieng ha ka kit ka bah ha ka leit ka wan bad ban leit trei leit ktah, lada ki duh ia ki lieng ka mut ki la duh ia ka ja kpoh.
Sa kawei ka jingeh kaba khamktah bha ia ki nongshong shnong ka dei ka jingdon lai tylli ki wah rit kawei ka Amlati, ka Amsohkyrchoh bad ka Ammara, kine ki wah kim don jingkieng, tang shu poi u slap kine ki wah baroh ki tuid bad Iaid lynti nalor u surok kaba ktah ia ka Iaid ka ieng ki briew bad ki kali motor, bunsien ki mar rep ki pyut ki sah ha shnong bym lait um shuh bad khamtam ki ba pang ba shitom bad kiba kha Khun lada ki mut leit hospital ki hap ban ap da ki phew kynta ne bunsngi ha duh ba ka um kan da rit te long ban iaid. Don napdeng ki nongpang bad nongkha Khun ki shu khlad ha shiteng lynti bad kha Khun ha ki lynti ki syngkieng namar ka jingktah kine ki wah bym don ki jingkieng nalor jongki.
Kine ki wah kim ktah tang ia ka Shnong Kharkhana hynrei baroh ki thain khappud ka East Jaintia bad ka West Jaintia, te kum ki nong Shong Shnong Kharkhana bad ka thain hi baroh kawei ki kyrpad jur eh ia ka sorkar ban peit lem ia kiba duk kiba rangli khnang ba ma kin ruh kin ia ryngkat kyrdan bad kiwei ki thain ka jylla.
Ki nongshong shnong ki kyntu ia ki Nongmihkhmat ba kin peit ia ki jingeh kiba ki kynduh ban wat ki lad ki lynti khnang ban ioh shna da ki jingkieng ha kine ki wah rit khnang ba ki nongshong shnong kin suk ha ka leit ka wan ba kin ioh leit die ia ki mar rep jong ki sha ki iew ki hat.
Na ka liang u president ka HYC War Jaintia Circle u samla Yoodahunki Shylla hadien ba la ioh ia kren bad ki nongshong shnong kitei ki shnong, na ka liang ka Seng ka kyntu jur ia ka sorkar jylla bad ia u myntri ba dei peit ia ka Disaster Management Department bad ia ka District Disaster Management Authority ba kin ai jingiarap ia kine ki shnong kiba la mat ia kine ki jingeh.
