Ka Jaintia National Council (JNC) Southern Border Zone, mynta ka sngi jong ka 17.09.2024, hapoh ka jingialam u General Secretary Marbaitlang P Suchiang ha ryngkat ka jingdon lang u Baitmon Biam Finance Secretary JNC-SBZ ka la leit ban ai da ka dorkhat ha u Executive Engineer ka MePDCL, Khliehriat Division ban pynsngew halor ka jingeh kaba ki paidbah jong ka shnong Bataw Dong Mihsngi East Jaintia, ki ia kynduh halor ka jingbym ioh bording tang namar bym pat ioh ia u transformer haduh mynta da ki snem.
Ka seng kala ong ba ha kine ki sngi ba mynta ban im khlem ka bording ka long kaba eh haduh katta katta namar lajan baroh ki jait kam la ka dei ha ka kam ïing ne kiwei kiwei ka bording hi ka long kaba kongsan tam hynrei sngewsih pat ba mynta ki paidbah jong ka shnong Bataw Dong Mihsngi ki hap ban im ha ka jingdum daki snem tang namar ba ka MePDCL Khliehriat Division kam lah ban pynioh ia u transformer haka shnong Bataw Dong Mihsngi bad kane ka jingleh jong ki bor ka sorkar ka long kaba sha palat bad ka bym sngewlah ban pdiang.
Ki nongialam ka JNC ha ka jingiakynduh ia u EE kila dawa bad kyntu na ka ophis treikam jong u baka dei ban phai khmat sha kane ka jingeh ba ki paidbah ka shnong Bataw Dong mihsngi ki ia kynduh bad ban pynioh noh kloi kloi ia u transformer khnang ba kan long ka jingkyrkhu bad ka jingmyntoi ia u paid nongshong shnong namar ban im haka jingdum hakum kine ki sngi kalong kaba sangsot ia u bynriew. Ka seng ka la kyntu ruh badei ban bujli noh ia ki post ki ba lah jot la pra kiba don hapoh ka shnong Bataw khnang ban lait na kino kino ki jingmynsaw hadien habud.