Ka Hynñiewtrep Youth Development Council (HYDC) mynta ka sngi Thohdieng hapoh ka jingïalam u President Rangbah u bah Wyraiwan Sohtun lem bad ki dkhot jong ka kila leit ban kynduh ïa u Executive Member ba peit ïa ka Trade jong ka Jaiñtia Hills Autonomous District Council (JHADC) u ma Jesse Suiam, ban pynsngew halor ka jingeh ki khun samla kiba dei ki trai jylla namar ka jingkyrduh kam palat ha ki sngi ba mynta.
Hadien bala dep ban ïakynduh ïa u EM u bah Wyraiwan Sohtun haba kren sha ki lad pathai khubor ula ong ba ka District Council ka dei kawei na ki atiar ban ïarap ïa ki khun samla ka jaitbynriew da kaba pynsangeh shwa ïaka rukom ai Trading Lisence sha ki bar jylla khnang ba ki trai jylla ki ïoh kam.
Ka seng kala ïakren bad u EM ban pyntreikam ïa ka Minimum Wages Act jong ka sorkar jylla, kumjuh ruh la dawa ban pynrung kam da ki trai jylla ha manla ki karkhana dewbilat kiba ki dang lah hi ban trei.
Kumba long mynta ula ong ka shem shitom bha ïa ka Council ban khynra naphang ïa ki dukan jong ki bar jylla, namar ha ka por ba pynlong ka jingkynra kot ïa ki dukan la wan kam pynban da ki trai jylla ïa kitei ki dukan jong ki briew ba nabar, halor kane ula kyntu jur ïa ki trai jylla ba kin nym shah ïalam bakla ha ki bar jylla, khnang ban shngaiñ ka lawei jong ka jaitbynriew hadien.
Na ka liang ka seng kala pyntip ba ka long kaba kloi ban ïatreilang bad ka JHADC ban pynurlong ïa ka jingthmu kata ban pynïohkam ïa ki khun samla bad ban kyntiew ïa ka khaïi ka pateng jong ka Ri-Lum Jaiñtia hi baroh kawei.
