Ki Contractor hapoh ka shatri jong ka All Meghalaya Contractor Supplier Association mynta ka sngi ka 4 tarik Nohprah 2025 ki ka wan kynduh ia u Symbud Myntri Rangbah ka Jylla u Bah Prestone Tynsong uba khmih ruh ia ka tnad PWD Roads na ka bynta ban pyntikna ba ka bill kin rung ha ki account shwa ka 20 tarik Nohprah 2025 .
Haba kren sha ki lad pathai khubor na ka liang u President ka AMCSA u Bah Precious Sumer u la pynpaw man ka por ba ka pisa ka poi ha u bnai Kyllalyngkot kaba long hadien ba lah kut ka aiom lehkmen bad kane ka buh jingeh ia ki ba bun ki Contractor namar lada poi pisa ha u bnai Kyllalyngkot kam don jingmut bad hap ia im da ka ram bad kumta ki kyrpad ia u Symbud Myntri Rangbah ban phah ia ka tnad Finance ban pyntikna ba ka pisa ka dei ban rung shwa ka 20 tarik Nohprah khnang ba ki Contractor kin ioh ban leh ia ka aiom lehkmen.
Shuh shuh na ka liang u President ka AMCSA u la pynpaw ruh haba iadei bad ka jingthmu ban pynkynriah noh ia ka Ophis jong ka PWD Central Division sha Madanryting bad kane ka wanrah jingeh ia kiba bun khamtam ia ki nongtrei ophis ki Contractor haba iadei bad ka leit ka wan ka parking kali ka jingkhapngiah kumta ki kyrpad ia u Symbud Myntri Rangbah ban wad jaka ha pdeng shillong khnang ba iaid beit ka rukom treikam jong ka PWD Central Division.
Na ka liang u Secretary ka AMCSA u Emmanuel Syiem u la pynpaw haba iadei bad ki kam ki jam baroh ha ka Package System bad na ka liang ki nongialam ka AMCSA ha u snem 2013 ki la file da ka Case haba iadei bad ka ADB funded Scheme bad ka AMCSA ka la ioh ia ka jingjop ha kaba ka ïingbishar ka la ai ia ka rai jingjop ia ka AMCSA bad ka ïingbishar ka la bthah ia ka Sorkar jylla ba kan phiah ia ki kam ba ki Contractor trai jylla ki lah ban trei bad na ka liang ki Contractor ka AMCSA ki lah da ka jingthoh sha u Symbud Myntri Rangbah ka jylla ba un shimkhia khnang ba ki scheme nangne shakhmat kiba lah ban phiah kim dei shuh ban pyntreikam katkum ka Package System khnang ba ki Contractor trai jylla kin ioh ban iashim bynta lang.
Na ka liang u Symbud Myntri Rangbah u Bah Prestone Tynsong u la ong ba un sa khot ia jingialang bad ki tnad treikam bapher bapher bad un sa bthah ban phiah ia ki kam katkum ki scheme bad lada lah ban phiah ia ki kam kan long ka jingmyntoi ia ki Contractor kiba dei ki trai jylla.
