Ki nongialam ka JSU u samla Treibor R Suchen u ba dei ruh u nongaibuit ka JSU War Jaintia Circle ryngkat ka jingdon lang u Vice President ka JSU seng kmie u Aplang Lamare, mynne ka sngi ki lah leit kynduh ia u DM&HO, ka West Jaiñtia Hills District ban pynsngew ha u halor ka jingduna ki Doktor ban sumar ia ki nongpang ha PHC Dawki. U samla Treibor Suchen u lah ong ba haduh mynta ka PHC Dawki ka don tang u wei u Doktor bad la kumba saw bnai eiei mynta ka PHC Dawki ka duna Doktor hadien ba u wei na ki Doktor u lah leit trei pat shawei pat.
Ka seng ka lah ai da ka dorkhas ha u DMHO bad pynsngew ia ka jingeh namar ka jingduna ki Doktor ha PHC Dawki ba kane ka buh jingeh ia u paitbah ka thaiñ baroh kawei. Hadien ba lah dep iakynduh bad u DMHO ka seng ka la ong ba na ka liang u DMHO u la shimkhia ia kane ka jingpynsngew ka seng bad u la ong ba ka sorkar ia mynta ka shem jynjar bha ban pynbiang Doktor namar ki duna palat ki Doktor sorkar hapoh ka jylla bad u DMHO u lah ong ba un pyrshang ban pynsngew biang sha ki bor ba halor, halor katei ka jingdonkam ka PHC Dawki.
Na ka liang u samla Treibor Suchen u lah pynsngew sha u DMHO ba ka PHC Dawki ka donkam haduh katta katta ban ioh ar ngut ki Doktor namar katei ka PHC ka long kaba bun nongpang. Ki nongpang ki wan ym tang na katei ka thaiñ Dawki bad Elaka Darrang hynrei ki nongpang ki wan ruh na marjan jong ka thaiñ. U samla Suchen u lah kyntu ia ka sorkar ba kadei ban pynbiang ia ki Doktor hapoh katei ka PHC Dawki.