Ki Nongialam ka Mawsaw C&RD Block Demand Committee mynta ka sngi ka 9 tarik Nohprah 2025 ki la wan kynduh ia u Myntri Rangbah ka jylla u Conrad K Sangma ban pynsngew halor ka jingdonkam ban pynkha ia ka Block thymmai kum ka Mawsaw C&RD Block.
Haba kren sha ki lad pathai khubor na ka liang u Chairman ka Mawsaw C&RD Block Demand Committee u Bah Commander Shangpliang u la ong ba ka jingkynduh bad u Myntri Rangbah ka long kaba seisoh bad na ka liang u Myntri Rangbah u la pynsngew ba ka sorkar kan sa shong jingialang haba iadei bad ka jingdawa ka kynhun Mawsaw ban pynrung ia ka block thymmai hapoh Mawkyrwat C &R D Block ka Mawsaw C&R Block.
Nalor kata u la ong ba ia kane ka jingdonkam ban wanrah ia ka Mawsaw C&RD Block la wanrah ruh da u MLA ka thaiñ Mawkyrwat u Bah Renikton L Tongkhar bad ka sorkar kan sa shim ia ka rai hadien ba kan pynbna ia ki block thymmai bad kyrmen ba ka Mawsaw C&RD Block kan rung lang ha ka thup ba ka sorkar kan sa pynbna thymmai haba iadei bad ka jingdonkam ia ka Block.
U la pynpaw ba haduh 118 tylli ki shnong bad ka jingbun briew katkum ka Census ha u snem 2011 ka la poi sha ka 35 hajar bad da kumno kumno haduh mynta kam duna shuh ia ka 50 hajar ne 60 hajar bad kane ka dei kawei na ki lad ban ioh ia ka block bad ka shong ha ka sorkar ia kane ka jingkyrpad ka kynhun ban wanrah ia ka Mawsaw C& RD Block.
