Shi bynta na ka jingdap ‘3rd Anniversary’ jong ka National Education Policy 2020 (NEP) 2020, ka Jawahar Navodaya Vidyalaya (JNV) Mukhla West Jaiñtia Hills District kum kawei na ka jaka pule kaba la shah jied hapoh ka NEP-2020, mynta ka sngi kane ka skul kala pynsngewthuh halor ka rukom treikam jong ka NEP-2020 lyngba u Principal jong ka u Neeraj Kumar.
Ha ka jingkren sha ki lad pathai khubor utei u Principal ula ïathuh ba ïa kane ka NEP 2020 la pyntreikam kumba 3 snem mynta naduh bala dep mynjur daka sorkar kmie haka 29 July, 2020 da ka jingthmu ban pynlong ïa ka Ri kaba khlaiñ bor ha ka pule puthi.
Kane ka rukom ai jinghikai ïa ki khynnah skul hapoh ka NEP 2020 kan lynthup haka 5+3+3+4 kata san snem ha ka Foundational stage, 3 snem ha ka Preparatory stage, 3 years haka Middle stage bad 4 snem haka Secondary Stage.
Shuh shuh kane kan ïarap kumno ban pynkiew ïaka pule puthi kaba ïar ha ki jingmut jingpyrkhat jong ki khynnad skul bad ha baroh ki liang naduh ka ktien ka thylliej, ka jingsngew, ka jinglehkhuid, ka juk jong ka jingstad saiañ, ka jinglaitluid, ka jingkitkhlieh halade nalor kiwei de.
La ïathuh hapoh ka ri na ka liang u Myntri Rangbah ula dep pynbna ïa ki 14,500 tylli ki skul hapoh ka ri kiba ïoh jingïarap lyngba ka skim Pradhan Mantri Schools For Rising India (PM-SHRI) Yojana bad kine ki skul kin pyntrei kam hok ïa ka NEP-2020.
Ha ka juh ka por kine ki skul kim pynleit jingmut bha ban ai jinghikai katkum ka juk ba mynta bad pynbiang ïa ki kor ki bor, ki kamra klas (smart), ki jait jingïalehkai nalor kiwei de.
Shi bynta ban pynsngewthuh shuh shuh ïa ka rukom treikam jong ka National Education Policy 2020 (NEP 2020), Na ka liang ka JNV kum kawei na ki skul hapoh ka Ri kaba la shah jied, kan sa pynlong ïa ka jingleit pynsngewthuh shaphang ka NEP-2020 hapoh ka District ha kine ki sngi ban wan kiba kynthup ha ki lai tylli ki Block kata ka Thadlaskeiñ, Laskeiñ bad Amlarem Block.
Halor ka jingpyntreikam ïa kane ka NEP 2020 na ka liang u Kumar ula ïathuh kiba bun na ki khynnah pule jong ka skul kala plie lad plie lynti ïa ki ban shah jied ha ka ban leit pule naduh ka MBBS, Engineering hadien ki jingïakhun jong ki ïa ki Exam. Ula ong ki kynnah skul kiba la ïoh jinghikai hapoh ka NEP-2020 kin ïoh lang kumjuh ïa ki jinghikai lyngba ki courses bapher bapher, ha kaba ki khynnah ki lah ruh ban jied ïa kiwei de ki kam hadien ba la dep pule na ka bynta ban seng ïa ki kam la jong bad ha ka juh ka por kan plie ïa ki ka lad ban ai kam naka bynta kiwei de.
