Ka Khasi Student’s Union (KSU) mynta ka sngi ka 20 tarik Lber 2025 ka la ioh ban rakhe ia ka jingdap 47 snem jong ka seng da ka jingialang ha khmat u mot sah nam jong ka seng ha Lachumiere Shillong kaba dei ruh kum ka dak ban kynmaw burom ia ki kam ba bha bad ki jingkheiñ duh jong ki Nongïalam kiba ha shwa jong ka Seng.
Tiak ban shu pynkynmaw, ia ka Seng KSU la seng ha ka 20 Lber 1978 da katto katne ngut ki samla kiba don ia ka jingkitkhlieh ban wanrah ia ka jingkylla bad ka jingiatylli hapdeng u
Khynriam, u Pnar, u Bhoi, u War, Maram, Lyngngam bad Diko. Na kane ka seng, la mih shibun ki Nongïalam kiba la trei shisha na ka bynta u Paidbah bad la don ruh katto katne kiba la don ha ka saiñ hima bad ha ka Sorkar.
Ha kane ka sngi la iadon lang da u President jong ka Seng, Bah Lambokstar Marngar, Bah Donald V. Thabah (General Secretary), Bah Raymond Kharjana (Organising Secretary) lem bad kiwei kiwei ki para dkhot na kylleng ki Distrik.
Kane ka sngi ka dei ruh ka sngi kaba ka seng ka la kyrsiew bad kyndang biang sa shisien ia ka Sorkar Jylla bad ka Sorkar Pdeng halor ka jingsahkut jong ka ILP. La iakren ruh halor ka Khyrnit ba 8 (8th scheduled) bad halor ka jingduh noh ia ki dkhot jong ka seng.
Haba ioh ban ïakren bad u President, u la iathuh ba seng kam ju shongthait halor ki mat bapher bapher kiba ka Sorkar ka leh kyllut wat lada ka mad ia ka jingshah tangon ha kiba bun ki liang. “Ka sorkar India ha ka mynnor ka la pyniasnoh jubor ia ka bri u Hynñiewtrep da ki ktang suloi hynrei ha kane ka jingjuk jong ngi mynta, ki hiar thma da kawei pat ka kam. Ia kaei ba ngi la pan kim shym la ai, ia kaei ba ngi dawa kim shym la ai. Na ka liang ka seng ngi pyrshang ia ki lad ki lynti kat kaba don ka buit ka bor” ong u Bah Lambokstar.
U Bah Marngar u la ong ba ka Sorkar ka wanrah da ki buit bad ki aiñ ki bym iahap bad ka rukom im jong u Khasi. U la pynkynmaw ruh ba ka jingpyntreikam ia ki mat ba ka seng ka la buh kan don ha ki tyrpeng jong 60 ngut ki nongthaw aiñ namar ia kine la thung bad la jied da u Paidbah.
