Yn pynïoh jingïarap u CEM haduh 5 lak tyngka naka 15th Finance Commission
Ka Ummulong Presbyterian College, West Jaiñtia Hills District ha kane ka sngi Siatjaiñ 1 tarik u Naitung kala rakhe ïa ka jingdap 10 snem jong ka jingshakri haka liang ka jingnang jingstad na ka bynta ki samla pule ka thaiñ kata naduh ba la seng ïa ka haka 01.07.2013.
Ha kane ka sngi u Chief Executive Member (CEM) ka Jaiñtia Hills Autonomous District Council (JHADC) ma Thombor Shiwat ula long u kongsan, ha ka jigïadonlang lang u Symbud kongsan ma Jessie Suiam, EM JHADC, ki nongïalam shnong, ki nonghikai bad ki samla pule jong kane ka College.
U ma Thombor Shiwat haba ai jingkren ula kular ban ïarap pisa haduh T.5 lak tyngka ïa kane ka College lyngba ka Central Scheme kaba wan na ka 15th Finance Commission, ha ka juh ka por u kyntu jur ïa ki bor pynïaid jong ka College ba kin trei shitom ban ai ka jingnang jingstad kaba bha tam ïa ki nongwan pule, da kaba ong ruh ka jingdon kum kine ki Collge kan ïarap shibun eh ïa ki samla pule kiba najan da kaba ym donkam shuh ban leit pule shabar.
Kiwei de kiba ai jingkren ki kynthup ïa u TBn. B. Pohshna na ka Sponsoring Body, ma Jessie Suiam (MDC), ka Principal Ummulong Presbyterian Higher Secondary School, kong M. Shangpung, u Waheh Shnong Ummulong ma L. Laloo, u Principal ka Ummulong Presbyterian College, u Dr. A.J. Lymba nalor kiwei de. Ha kane ka sngi kum ka dak jong ka jinglehkmen la ot ruh ïa u cake jong ka jingdap 10 snem.
