Mynta ka sngi ka East Jaintia National Council (EJNC) kala kynmaw burom iaka lyngkhuh sngi iap ba 159 jong u Kiang Nangbah da kaba pynlong ia ka jingiaid Rally naduh na Madan Khliehriat Highest Secondary School shaduh u Mot sahnam jong u Kiang Nangbah ba don ha phyllaw DC Ophis , Khliehriat.
Ha shwa ka jingbuh syntiew ha u dur mot u Kiang Nangbah kum ka dak ka jingkynmaw burom ia une u Khlawait ka Ri kala don ka jingialang lyngkot halor ka Phang Pdeng “Watlong ki Suri Kup Snieh Langbrot” la pyniaid iaka jingialang da u bah Nangjan Dkhar, Genl Secretary EJNC – CEC.
La ioh ia ki kyntien pdiang burom, da u bah Ency Shadap, lah ioh ia ka jingkren maitphang ia ka Phang pdeng da u bah Mebantei Sukhlaiñ, Genl Secretary EJNC – Khliehriat Circle.
Ki Nongkren ki kynthup ia u Samla Lektor Dkhar, President EJNC – Khliehmyntriang Unit, Samla Jersom Shylla President JSU – CB, Kong Bythygrace Dkhar President HANM – Women Wing bad u bah Sambormi Lyngdoh President EJNC – CEC.
Baroh ki nongkren kila pyrto ia ka jinglong dapshynrang jong u Kiang Nangbah, uba don ka jingkitkhlieh ia ka ri bad ka jaitbynriew, kat haduh ba ula hap ban aiti iala ka jingim na ka bynta ka ri. Kumta ki khot ki wer ia ka pateng ba mynta ban bud ia ki nuksa jong u Kiang Nangbah khnang ba ka ri bad ka jaitbynriew kan im.
