Ka seng Hynñiewtrep Border Dispute Redressal Forum (HBDRF), hadien ba la dep ban pynskem ia ki nongkitkam jong ka ha 22/11/2025, ka Forum ka la pynlong ka jingkynmaw burom ia ki san ngut ki lanot kiba la shah siat iap ha ki Forest Guards bad Pulit Assam kaba la jia ha ka 22/11/2022 ha shnong Mukroh, West Jaintia Hills District.
Haba ai jingkren u Chairman ka Forum u ma Chandame Sungoh ula ong “Dap da ka jingsngewdiaw mynsiem ban kynmaw ba ha ka step phyrngap jong ka 22/11/2022 ki san ngut ki rangbah na ka shnong Mukroh kiba kynthup ia u (L) Thal Shadap, u (L) Chirup Sumer, u (L) Tal Nartiang, u (L) Si Dhar bad u (L) Six Talang kila kyllon iap ha ki kuli suloi jong ki Assam Forest Guards bad ki Pulit Assam”.
Na ka liang ka Forum kala shim ia ka rai ban iai buddien lang ryngkat bad ki nongshong shnong ka Mukroh ha ka jingiadei bad kane ka jingjia, na ka bynta ban dawa ia ka jingbishar kaba hok, halor kane ka jingshah siat iap kitei ki rangbah.
Ka Forum ka la rai ruh ban buddien ia ki jingthoh kiba la dep ai bad ki jingialang kiba la dep ban iashong bad ka sorkar jylla. Kum ban shu pynkynmaw ba ha ka 13/11/2025 ka Forum kala leit ban ai ia ka shithi pynkynmaw (remainder) sha u Chief Minister ka jylla u Conrad Sangma ban ioh ia ki jubad kiba ka Forum kala dep ban iashong jingialang bad ka sorkar, ha kaba la ai por shitaiew ia ka sorkar ban ai ia ka jubab, lymda kumta kan sa shim da kiwei pat ki lynti.
Ka Forum ka la pynpaw ka jingsngewnguh ia ka Jaiñtia Hills Autonomous District Council (JHADC) kaba la iakren halor ka jingkyntur pud jong ki Karbi ha ka Shnong Lapangap. Ka la ai khublei ruh ia ki MDC liang pyrshah kiba la wan rah ia ka Motion bad kumjuh ia u CEM u ba la lah ban ai ia ka jubab.
Ka Forum ka kyrshan ia ka Council na ka bynta ban Rivise ne ban leit jngoh ia u pud u ang ka Council ha ka jingiadei bad ki jaka kiba ju klun jubor da ka Karbi Anglong, Assam.
Ka. Forum ka la rai ban pynlong biang ia ka jingialang noh mar mar ia ka jingialang jong ka na ka bynta ban pyrkhat ia ki kam kiba dei ban leh kloi nangne sha khmat. Kane ka long katkum ka kyrwoh ba la phah da u ma Chandame Sungoh, Chairman ka Forum.
