Ka Khasi Students Union (KSU) ha ka 30 tarik Nohprah 2024 ka la kynmaw burom ia ka lyngkhuh sngi ïap ba 162 jong u Kiang Nangbah.
Ia kane ka jingkynmaw burom la leh ha u mot dur jong u Woh Kiang Nangbah ba don ha pyrshah Civil Hospital Shillong.
Ha kane ka sngi kynmaw burom la wan ban don ryngkat lang da ki dkhot sengbhalang bapher bapher kynthup ia ka KSU, FKJGP, HITO, NESO bad ka KSU West Jaintia Hills.
La pyniaid ia ka jingialang da u Samla Biangbor Paliar, Vice President Ka KSU Sengkmie.
Ha shwa ban sdang ia ka jingialang la pynlong ia ka jingbuh syntiew ha u mot dur jong u Kiang Nangbah da ki dkhot sengbhalang bapher bapher kynthup ia ka KSU, FKJGP, HITO, NESO, kum ka dak ban kynmaw burom ia une u khlaw wait ka Bri Hynniewtrep u Woh Kiang Nangbah.
Haba kren ha kane ka sngi na ka liang U President jong ka HITO u Samla Donbok Dkhar u la ong, “Na ka por sha ka por ki dkhot sengbhalang ki kren shaphang ka dawbah jong ka jaitbynriew, u woh Kiang Nangbah u la iakhun ban ioh laitluid, hynrei haduh mynta pat ngi dang ioh kata ka jinglaitluid kaba shipor hapoh ka jingialam jong u kharïong, haduh mynta ngi sngewsarong bad iai ban beit “khasi by blood Indian by force” ia kane ngi dei ban neh hapoh klongsnam jong ngi”.
Shuh shuh u la ong “Ki Sengbhalang ki noh synniang lada ym don ki Sengbhalang la kut dang myn ha kane ka jingshah ksih ka jaitbynriew ha pdot ki dang don kiba ong ba ym donkam ILP, kane ka dei ka khubor ka kyrwoh sha ka sorkar kum kane ka tourism kan wanrah ban pynpra ia ka niam bad ka jaitbynriew bad ia ka riti dustur jong u Khasi ngin nym ailad kumba u Kiang Nangbah u kut ia ka jingim jong u ha u tyllai phasi, ngi kum ki khun Hynniewtrep lada iai ialeh ngin hap ialeh ka don ka khep ba ngi hap iakhun da u khulom ngi hap ban shlur lada ngim shlur kan long lehnohei bad to tip ba ki Sengbhalang ki ieng ha ka mynnor ha ka history jong ki lym kumta baroh ki lah ialong ophisar bad kim don hok shuh ban kren ia ka history jong ka Jaitbynriew”.
Haba ai jingkren ha kane ka sngi na ka liang U samla Lambokstarwelk Marngar, President jong ka KSU u la ong “U Woh Kiang Nangbah u pynphalang pat ia ki jingmut jingpyrkhat khamtam sha ki mynsiem jong ki khun samla ka jingkylli ngi hap ban kylli ialade shimet hato ngin shu pule ngin shu wad bniah hato ngin shu kynmaw burom ia kata ka jinglenlade jong u Woh Kiang Nangbah kaei pat ka kamram jong ngi ban leh ei ei na ka bynta ka jaitbynriew”.
“Ngi sngewthuh ba ngi im ha ki jingtynjuh bapher bapher kum ka jaitbynriew ngi iakynduh na ka sngi sha ka sngi, ka kamram kum ki dkhot ka jaitbynriew ngi dei ban leh kaeikaei kaba bha tam ban len lade na ka bynta ka jingdonkam jong ka Jaitbynriew, ka dei ka jaitbynriew kaba rit paid, ka jaitbynriew ka kren bad ka batai ka ju sei ia kita ki samla ki riewialeh na ka bynta ka jingmyntoi bad ka jingbit jingbiang jong ka Jaitbynriew baroh kawei”.
Shuh shuh u la ong” Da ka jingsngewrit ngi khot ngi wer ngi pan ka kti ka mon ka kti ka diang na kylleng u paidbah ka bri u hynniewtrep ban shim ia ka bynta ban ieng ha ka nongrim ban tied jingkhang ia kita ki nong thaw aiñ ban pynurlong shisha ia ki mat kiba ktah shisha ia ka Jaitbynriew baroh kawei”.
Na ka liang u samla Kitboklang Nongphlang, Vice President jong ka FKJGP u la ong, “Kum ka Jaitbynriew ngi kynmaw kyrpang ia ka jinglenlade ka mynsiem ba shynrang kaba u une u riewialeh um shim la pyndem tdong haduh ka khyllipmat ba un ring mynsiem u ieng skhem ban im ka jaitbynriew ka pateng ka ban wan, Kum ka jaitbynriew haduh katno tylli ki snem ngi dang khmih lynti ba ngin ia long kumne shi kumne hato ngim kwah mo ba ki longdien jong ngi kin kynmaw ia ngi ki longmynta ba kin pyndonburom ynda la leit noh na kane ka sla pyrthei bad ngin kylli shimet shimet aiu ngi la leh na ka bynta ka dawbah jong ka Jaitbynriew”.
Na ka liang U Bah Samuel Jyrwa, Chairman jong ka North East Students Organisation haba kren ha kane ka sngi u la ong “Kaei kaba ngi kynmaw ia u woh Kiang Nangbah kaei kata ka nongmuna kaba u woh Kiang Nangbah u la ieh noh shadien”
Shuh shuh u la bynrap kum ka jaitbynriew ngi hap ban pyrkhat ban sngewthuh ia kine kiei kiei baroh ba ngi kum ka jaitbynriew ngi iakynduh jingeh na kawei ka sngi sha kawei pat bad kum ka pateng kaba mynta kaei kaba ki pateng ki ban wan kin kynmaw ia ngi ka pateng kaba kumno la ka pateng kaba iothiah lyngai kaba ailad ban thombor la ka pateng kaba peit tang ialade shimet, ngi kwah ba ka pateng ban wan kan pyrto ia kane ka pateng kaba mynta ba ki long shisha ka pateng kaba mih ban ialeh ban iakhun na ka bynta ki dawbah jong ka Jaitbynriew bad ka shong ha ka pateng ba mynta kumno ban pyrshah ia kine kiei kiei baroh khnang ba ki jingthmu ban tih liewlep ia ngi ka jaitbynriew kin ym urlong kin ym wan jia lano lano ruh”.
