Ka 2 tarik jong u bnai Risaw kaba dei ka sngi rakhe ïa ka sngi kha u Mahatma Gandhi ha kylleng ka Ri India ïa kaba la ai kyrteng ka ‘Gandhi Jayanti Day’, shi bynta na kane ka Loomkyrwiang Dorbar Shnong, Jowai mynta ka sngi kala kynmaw burom da ka jingïashim bynta lang haka jingpynkhuid shnong.
Hashwa kane la don ka jingïalang ba lyngkot ba la pynïaid da u Daioolang Pakma, Symbood Waheh Chnong, la ïoh ka jingkren na u Waheh Chnong ma Lammat -OO Laloo, katba ïa ki kyntien kyrpang kiba ïa dei bad kane ka sngi la pynsngew da u S.D.Laloo, General Secretary LDC.
U ma S.D.Laloo ula ïathuh khana lyngkot shaphang u Mahtma Gandhi kum u briew uba ïaleh pyrshah ïaki bor ka Sorkar Phareng haka lynti khlem da umsnam (Non-violence), kat haduh ba ka Ri India kala ïoh ïa ka jinglaidluid na ka jingshah synshar na ka sorkar phareng ha u snem 1947.
Shuh shuh ula kren shaphang ka Swachh Bharat Mission kawei na ka Mission kaba la ai nam da ka Sorkar India naka bynta u Mahatma Gandhi ban pynlong ïa ka Ri India kaba khuid ba suba. Kum ban pynkynmaw la sdang ïa kane ka Mission hapoh ka jingïalam u Prime Minister ka Ri u Narendra Modi, ha ka 2 tarik Risaw 2014 kaba la ïaid mynta la 10 tylli ki snem kynthih.
Ha kane ka sngi ki nongshong shnong ka Loomkyrwiang Dorbar Shnong kila shim bynta lang ban pule ïa Swachh Bharat Pledge ban shim ka jingkular ban ïatrei lang bad ka Sorkar na ka bynta ka jingkhuid jingsuba.
La pynlong ruh ïa ka jingïapynkhuid shnong (Cleaning Drive) hapoh u pud u sam ka shnong kynthuh ïa ki lynti ki synkieng, ki tyllong umbam umdih bad kiwei de, bala shim bynta naduh ki longkpa, ki longkmie, khun samla bad ki hep kiba rit.
