Ka Meghalaya Bharat Scouts & Guides, West Jaiñtia Hills hynnin ka sngi kala pynlong ïa jingkynmaw burom ïa ka sngi ba kyrpang ka Scouts-Guides Movement kaba la tip kum ka Thinking Day & Founder’s Day, ha kaba ki Scouts, Guides, Rovers, Ranger ha ryngkat ki Unit Leaders kila wan ban ïachim bynta lang.
U Adiam Bthuh, District Secretary, Meghalaya Bharat Scouts & Guides, West Jaiñtia Hills ha ka jingkren kum u shongknor ula pynsngew shaphang ka nongrim jong kane ka sngi kaba dei ka sngi kha jong ki arngut shi lok kiba la lap ïa ka Scouts-Guides Movement kiba tip kum u Lord Baden Powell bad ka Olave Baden Powell.
Ban khring shuh shuh ïa ka pyrkhat pyrdaiñ jong ki dkhot ka Scouts-Guides Movement la ïoh ruh ka jingkren kyrpang na ka Doly Lamare, Asst. District Organizing Commissioner (G) bad u ma Ohiwot Laloo, District Commissioner (S), West Jaiñtia Hills District.
Ka kong Doly Lamare Asst. District Organizing Commissioner (G), kala pynpaw ïa ki jingeh kiba harukom mynta ki sngi bad ka jinghiar dor jong ka Tipbriew Tipblei, kumta kala kyntu ïa ki dkhot ka Movement ba kin long ki nuksa babha ïa kiwei ki pat khnang ban wanrah ïa ka jingshong suk shong shngaiñ bad kiba khieñkor ïa ka mei mariang.
Na ka liang u ma Ohiwot Laloo, District Commissioner(S), West Jaiñtia Hills ula pynsngew sha ki khynnah ka Scouts-Guides, Rovers-Rangers, da kaba ong ba ïa kane ka sngi la kynmaw burom hapoh ka Scouts-Guides Movement ka long kum ka dak ban leh burom ïa ka sngikha jong kitei ki ar ngut shi lok.
Ula ïathuh mynshwa ïa kane ka sngi la tip kum ka World Brotherhood Day na ka bynta ki shynrang bad ka ‘Thinking Day’ na ka bynta ki kynthei bad la tip ïa ka ha ka kyntien Thinking Day bad ka Founder’s Day.
Ha ka juh ka por ula ai mynsiem ïa ki dkhot ka Movement ha ryngkat ki kyntien sneng ïa ki Scouts-Guides, Rovers-Rangers da kaba ong haba pynïasoh bad ka Movement dei ban long ki briew kiba don ka thong ban pyndep bad ban ïoh ïa ka kyrdan ba kham shalor jong ka Movement ha ka juh ka por ki dei ruh ban ri burom ïa ka akor kaba hakhmat eh.
La pynphuh pynphieng shuh shuh ïa kane ka sngi da ki jingrwai ki jingshad bala shim bynta da ki Rovers-Ranger bad ki khynnah Scouts-Guides.
