Ka 1 tarik Nailar ka dei ka sngi kyrpang jong ka World Scouts Organization kaba la tip kum ka World Scouts Scarf Day, na ka liang ka District Association jong ka Meghalaya Bharat Scouts and Guides, West Jaiñtia Hills hynnin ka sngi kala pynlong ïa ka jingïakynduhlang ha District Headquarter bala wan ïashim bynta da ki Scouts Master, Guides Captain, Rover-Rangers bad ki Scouts-Guides.
U Pet Dhar, Jt. Secretary, MBSG, West Jaiñtia Hills ha kane ka jingïakynduh ula ai ki kyntien lamkhmat ha kaba ïadei bad kane ka sngi, la ïathuh ba ka thong bad ka nongrim jong kane ka World Scouts Scarf Day ka long shi bynta ban kynmaw burom ïaka sngi sdang u Lord Baden Powel ïa kawei na ki Camping jong ki khynnah Scout kawa la long ha u snem 1907 ha Brownsea Island bad ïa kane ka World Scouts Scarf Day la sdang leh burom naduh u snem 2007 kaba long ruh ka snem dap 100 snem ka jingsdang u Lord Baden Powell ïa ka Scouts Movement.
U ma Ohiwot Laloo, District Commissioner Scouts, West Jaiñtia Hills haka jingkren ula pynkynmaw ïa ka jingkordor jong I Scarf ha uwei pa uwei ne kawei pa kawei ki dkhot jong ka Scouts-Guides Movement namar lyngba I Scarf lah ban leh shibun ki kam ban ïarap ïa ki para briew.
Shuh shuh halor ka phang jong kane ka sngi kaba ong ‘Our World-Our Future and Gender Equality’ la kyntu ïa baroh ki dkhot ka Movement ba kin ïatreilang khang ba kin ïoh ïa ka jingbha jingmiat hapoh ka imlang ka sahlang, ha ka District bad ka jylla hi baroh kawei.
