U Bah Winston Tony Lyngdoh Chief Executive Member (CEM) ba thymmai ka Khasi Hills Autonomous District Council (KHADC), hynne ka sngi ka 9 Risaw 2025 u la pyntip ba ka Council ka pyrshah bad kyntaid mardor ia ka rai jong ka Sorkar pdeng lyngba ka tnad Ministry of Environment Forest & Climate change (MEFCC) ban tih ia u Mar poh khyndew (Uranium) uba don ha Mawthabah South West Khasi Hills District (SWKHD) kaba hap hapoh u pud u sam jong ka KHADC.
U CEM u la iathuh ba ha ka 8 Nailur 2025 ka MEFCC ka la ai ia ka jingthoh sha ka Council kum ka jingpyntip ba ka Sorkar India kan tih ia baroh ki Mar ‘poh khyndew kiba don ha ka Ri khlem da sngap shuh ia ka sur bad ka jingpyrshah u Paidbah khamtam ia u Uranium uba dei u Mar uba donkam tam na ka bynta ka Ri.
Ha kaba iadei bad kane, u Bah Winston u la ong ba ka Council kam mynjur da lei lei bad katei ka rai bad kum ka jingpynshai, u CEM u la phah da ka jingthoh kaba long ruh ka jubab sha u Myntri ka MEFCC – u Tanmei Kumar ba ka Sorkar ka dei ban weng noh ia katei ka Dorkhas ba la pynmih da ka ophis.
