Ka Meghalaya Medical Services Recruitment Board (MMSRB) hynne ka sngi palei (3/10/24), ha ka jingiakynduh bad ki lad pathai khubor kala kyntait ia ka jingkynnoh ha kaba ïadei bad ki jingbym beit ha ka rukom thung kam, kynthup ïa ki jingkynnoh ba la shortlist ïa ki kyrtong ki ba khlem wan ban iakhun ia ka Exam.
Lah ban kdew hangne ba na ka liang ki samla ki ba iakhun ia ka exam na ka bynta ka Staff Nurse bad Auxiliary Nurse and Midwife (ANM) ki la mih shakhmat ban pynpaw ia ka jingbym hun ia ka rukom pynmih result ka MMSRB .
Haba kren sha ki ladpatahi khubor, i member secretary ka MMSRB, Dr L Mylliem Umlong ka la ong ba ki la mad ïa ki jingkynnoh kiba jur bha ha kaba ïadei bad ki jingbym beit ha ka rukom thungkam, kynthup ïa ki jingkynnoh ba la jied shortlisted ïa ki kyrtong kiba khlem wan ban thoh exam halor kane ka MMSRB ka kyntait ia kine ki jingkynnoh .
Nalor kata i Dr L Mylliem Umlong i la ong ba ïa kane ka jingpynrung kam la sdang lyngba ka jingpynbna kaba la pynmih ha ka 30/7 /2024 ryngkat bad ki jingtbit kiba donkam bad ki jingpynbeit ban pynlait rta.Hadien ba la ïoh pdiang baroh 5603 tylli ki aplikeshon na ka bynta ka Staff Nurse bad 706 tylli ki aplikeshon na ka bynta ka ANM, la ai ïa ki admit card bad kaba kongsan ka long ba kam shym la don kano kano ka jingpynshisha ïa ki kot ki sla ha ka kyrdan pre written examination, da kaba bud ryntih ïa ka Office Memorandum No. PER/(AR) 25 . 2022.
Shuh shuh i Dr Umlong i la ong ba ka Office Memorandum ka bthah ba dei ban pynsangeh ia ka jingpynshisha ia ki kot ki sla tad haduh ba ki kyrtong ki la pass ia ka eksamin ba ki thoh. Kumta hadien ka eksamin, ka MMSRB ka la jied lyngkot ia 495 ngut na ka bynta ka Staff Nurse bad 263 ngut na ka bynta ka ANM, da kaba pynshong nongrim tang ha ka jinglah jong ki.
“Ka jingdon jong ki kyrtong ba la jied lyngkot ka long lai shah ia ka jingdon jong ki kam ba lait na ka bynta kawei pa kawei ka kyrdan da kaba khmih lynti ba ki katto katne ki kyrtong ki lah ban ym don ia ki kot ki sla kiba biang bad kumjuh ruh ha kaba iadei bad ka jingshisha ba ka Board ka kwah ban pyndap ia ka kam ba lait baroh kawei hapoh une u snem” ka la bynrap.
Ha kaba iadei bad ka jingkynnoh ba don ki jingleh bym hok, i Dr Mylliem Umlong i la ong “Hadien ba la pynmih ia ki kyrtong ba la jied lyngkot, la mih ki jingpyrshah, kaba nyngkong eh ba ia ka thup ym shym la pynbynta katkum ka State Reservation Policy. Ka MMSRB ka la kohnguh ia ki jingdawa bad ka la pynmih ia ka thup ba la pynkylla, katkum ki thup (categories) bad ki marks ba la ioh da uwei pa uwei u kyrtong”.
“Halor ka jingbym sngewhun ki samla ba thoh exam, ngi la pynlong ïa ka jingïalang ha ka ophis jong i myntri ba dei peit ïa ka tnad koit ka khiah bad la rai ba ïa ki roll number bad ki marks jong baroh ki kyrtong yn pynmih ha ka rukom duna ki mark bad ki kyrtong ki lah ban ujor da ki jingujor ba pura sha ka Grievances Cell bad rai ruh ban pynshisha ia ki kot ki sla tang na ka bynta kito ki kyrtong kiba biang katkum ki kam ba lait. Lada ym lah ban pyni ia ki kot ki sla kiba donkam, yn sa pyrkhat ia ki kyrtong ki ba hadien katkum ka jinglah jong ki . Namarkata, katkum ka jingpynbna jong ka 30.09.2024 la pyndam noh ruh ïa ka thup kyrteng ki kyrtong ba la pynmih ha ka shortlist ” i la ong.
“Don na ki kyrtong kiba la apply ha baroh ar tylli ki kyrdan kiba kynthup ïa ka kyrdan ïalehkai kyrpang. Kumta, la shim ruh ia ka thup ba kyrpang hapoh ka kyrdan ialehkai. Kumta, ka jingmih arsien jong ki katto katne ki Roll number, ka dei ba la shim ia ka thup ba la pynbeit hadien hynrei namar ki jingkylli kiba dang mih ka tnad ka la rai ban weng noh ia ka thup jingpynbna ha ka 30/9/2024 ban lait na ka jingkulmar shuh shuh ia ka thup ba khatduh hadien ba la pynshisha ia ki kot ki sla yn sa shim katkum ki kam ba lait kiba la don lypa”.
Halor ka jingkynnoh jong kawei ka kyrtong ba don ia ka roll number 0597 na ka thup Khasi-Jaintia na ka bynta ka staff nurse, ba kam shym la wan ialeh ia ka eksamin hynrei u roll number jong ka u paw ryngkat bad ki marks ba la ioh, i Dr Umlong i la ong ba katei ka juh ka roll number ba la pyndep ia ka eksamin ka dei ka kyrtong na thup Garo ha ka kyrdan ANM.
“Ka MMSRB ka pynskhem ia ka jingkular jong ka ban don ka rukom thung kam kaba hok bad kaba shai bad ka pynkynmaw biang ba ka jingthung ia ki kyrtong ba la jied lyngkot ka shong ha ka jingpynshisha ia ki kot ki sla. La thaw ruh ia ka Grievance Cell ban iada na kano kano ka jingpynkheiñ ia ka hok bad kino kino ki kyrtong kibym hun ki lah ban leit ujor sha ka cell ban ioh ia ka jingpynshai khnang ban lait na ka jingpynthut ia ka jingtreikam jong ka Board ban pyndep ia ka jingpynrung kam ha kane ka bynta” la bynrap i Dr Mylliem Umlong.