Kum shi bynta ki sienjam ai jingtip jong ka sha ki paidbah kiba dang ïaid shakhmat, ka Central Bureau of Communication (CBC), Shillong, kaba hap hapoh ka Tnad Information & Broadcasting, Sorkar India, ka la pynlong ïa ka prokram ai jinghikai ba kyrpang ha Kyntiew Shaphrang Higher Secondary School, Laitlyngkot hynnin ka sngi. Ia kane ka jingialang la pynlong hapoh ki phang pdeng Swachhata Hi Seva, Poshan Abhiyan, bad Ek Ped Maa Ke Naam, da ka thong ban kyntiew ia ka jingsngewthuh ia ka mariang, ka jingbam kaba tei met, bad ka jingkitkhlieh kum ki nongshong shnong hapdeng ki khynnah pule bad ki paidbah.
Kane ka prokram ka dei shi bynta jong ka campaign ba iai bteng jong ka CBC Shillong ban kyntiew ïa ka jingpynsngewthuh ha ki jaka nongkyndong bad ka jingïashim bynta jong ki nongshong shnong lyngba ki kam ai jingtip, ka jingai jinghikai bad ki kam kiba wanrah ia ka jingtip.
U Dr. L. Jaba, Medical Officer bad In-charge jong ka Laitlyngkot PHC u la batai shaphang ki bynta jong ka “Ek Ped Maa Ke Naam” kiba iadei bad ka jingngeit bad ka mariang. “Ka jingthung dieng ban pyndon burom ia ki kmie jong ngi ka dei ka dak kaba donbor jong ka jingieid bad ka jingkitkhlieh ia ka mariang”, u la ong. U Dr. Jaba u la kren ruh halor ka Poshan Abhiyan, da kaba ban jur ïa ka jingbam ba tei met kum ka nongrim na ka bynta ka jingim kaba koit ba khiah, kaba seisoh. “Ka jingduna ha ka jingioh ia ka bam kaba tei ka dei ka jingeh kaba jar jar. To ngin ïatreilang ban tei ïa ka ri India kaba koit ba khiah lyngba ka jingbam kaba tei bad ka jingleh khuid”, u la kyntu.
U la ban jur ia ka bynta jong ki khynnah, ki kmie, ki nonghikai, bad ki nongtrei ha ka kam ai jingsumar ha kaba wanrah ia ka “India kaba biang bha ha ka jingioh ia ka bam kaba tei met bad kaba koit ba khiah.” Halor ka phang jong ka Swachhata Hi Seva, u la kren shaphang ka jingstad ba iaineh jong u Mahatma Gandhi, da kaba ong, “U Gandhiji u ngeit ba ka jingkhuid ka kham kongsan ban ia ka jinglaitluid. Mynta, ngi dei ban burom ia ka jingthmu jong u lyngba ki kam— da kaba sdang nalade, na ki iing ki sem jong ngi, bad na ki skul jong ngi.”
Ka Kong O. Sumer, District Health and Education Officer, East Khasi Hills District, ka la ai jingkren ha ka jingialang ai jingtip halor ka jingdonkam jong ki khynnah kiba dang khie samla ia ka bam kaba tei. Ka la pynleit jingmut halor ka jingkyntiew ia bor tei met jong ki jingbam lyngba ka rukom shet kaba biang, ka jingdonkam jong ki micronutrient, bad ka jingiada na ka jingduna snam lyngba ka WIFS (Weekly Iron and Folic Acid Supplementation). “Ki khynnah skul ki dei ban nang ban sngewtynnad ïa ki jingbam bad ban sngewthuh ïa ka dor jong ki—ym tang ban bam ban pynkdang,” ka la ong.
Ka Kong Anie Swer, Block Coordinator, Swachh Bharat Mission Gramin, Khatarshnong C&RD Block, Laitkroh ka la kren halor ka jingdonkam jong ka jingkitkhlieh lang ha ka ban pynurlong ïa ka jingkhuid jingsuba. “Ka Swachh Bharat kam dei tang ka campaign—ka dei ka thong kaba shong ha ka jingïatreilang,” ka la ong. Ka la kyntu ïa ki khynnah skul ban ïatreilang bad ki nonghikai skul, ki longïing, bad ki bor shnong ban pynneh pynsah ïa ki sawdong sawkun kiba khuid bad ban pynthikna ba ka jingktah jong ka mission kan poi sha man ki kyndong kynshrot jong ka imlang sahlang. Ban pynkhlain ia ka khubor jong ka jingkhuid jingsuba, ka la pyni ruh 7 tylli ki sienjam jong ka jingsait kti, da kaba ai bynta ia ki khynnah skul ha ka kam kaba ban jur ia ka jingkhuid jingsuba shimet bad ka jingiada na ki jingpang.
Kum shi bynta jong ki kam, kane ka prokram ka don ïa ka jingïakop saindur halor ki phang jong ka jingkhuid jingsuba, bad ka jingbam kaba tei, ryngkat bad ka jingïakop Quiz kaba itynnad bha kaba la tynjuh ïa ka jingtip jong ki samla pule halor ka koit ka khiah, ka jingsumar ïa ka mariang, bad ki campaign ha ka ri. Kine ki bynta ki la pynshlur ïa ka jingsaindur, ka jingpyrkhat kaba jylliew, bad ka jingioh jinghikai lyngba ka jingiadon bynta ha ki kam. Ki nongjop ki la ioh jingithuh da ki syrnot bad ki khusnam, kaba la ai mynsiem ia kiwei pat ban iashim bynta bad ban ioh jinghikai lyngba ka jingiashim bynta.
