Ka Civil Society Women’s Organisation (CSWO) mynta ka sngi ka la kyntu ia ki bor Sorkar ba ki dei ban pynkloi ka jingiarap sha ka longkmie ka ba la mynsaw jur na ka jingshah thang ha u tnga jong ka , u Dahun Dkhar. Lah ban kdew hangne, ba ka Kong Wompher Suting ka la shah thang ha la u jong u Kurim ar bnai mynshwa hapoh īing sah jong ka , ha kane ka jingjia ka Kong Wompher ka la mynsaw jur , na ka jinging kaba long 45 % ha ryngkat i khun jong ka I ba la mynsaw ha ki bynta Jong ka khlieh. Na ka liang ka CSWO, ka pynrem jur ia ka jingthombor jong u Dahun Dkhar ia ka kong Wompher Suting ha ka shnong Niriang, kaba hap ha West Jaintia Hills District, Meghalaya. Ka Kong Wompher Suting mynta ka dang ialeh na ka bynta ka jingim jong ka ha hospital ha kane ka khyllipmat, bad u tnga jong ka u dei hok ban ioh ia ka jingpynshitom kaba jur tam namar ba u la leh ia kane ka kam runar kaba shyrkhei. Ka Seng ka kyntu ïa ki bor ba dei peit ban ïarap mardor ïa kane ka longkmie ha baroh ki liang bad ruh ban ai bai lutksan mardor ïa kane ka longkmie bad ïa u khunlung ba dang 1.3 snem ka rta kiba la shah thang lang ha une u runar , baroh ki jinglut jingsep na ka bynta ban sumar ia ka dei ban kyrshan da ka Sorkar. “Ngi kyntu ruh ia ki bor ba dei peit ban shim khia ban iada, pynbha bad pynnang pynstad ia kiwei pat ki khun jong ka, baroh ki khynnah rit kiba la mad ia ka jingshah pynshitom beiñ ban sakhi ia kum kane ka jingshah lehbeiñ ha ïing ha sem”. “La kyntu ba dei ban pynbiang ïa kane ka longïing da ka ration card bad ka MHIS card bad kiwei kiwei ki jingdonkam jong ka sorkar ki ban pynsuk ïa ka jingim jong ki” la ong ki dkhot ka CSWO lyngba ka kyrwoh.Ka CSWO ka iaroh ruh ia ka nongpyntip kaba la pyntip khnang ba kum kine ki jingjia kin ym buhrieh namar ki khynnah bad ki kynthei ki shah shitom ha ka jingsngap jar. Kane ka long katkum ka kyrwoh na ka kong Agnes Kharshiing president CSWO bad ka kong Evangeline Thabah Gen Secy CSWO.