Ki nonglamkhmat jong ka Dorbar ki “Waheh Kur ka Ri Jaintia” kiba kynthup ia u Khroo L Pariat President, u Pyrkhat Shylla Vice President wa u G. Bareh Assistant General Secretary lem bad ki dkhot ka dorbar ha kane ka 16 tarik Naitung kila leit ia kynduh ia u Deputy Commissioner, West Jaintia Hills District u bah B.S.Sohliya, IAS Deputy Commissioner, West Jaintia Hills District.
Ha ha kane ka jingiakynduh na ka liang ka Dorbar ki Waheh Kur, Ri Jaiñtia ka la aiti ruh ia ka shithi ban kyrpat ruh u DC ban iatreilang bad ka Dorbar Kur ha ka jingiadei ban ai Scheduled Tribe Certificate sha ki Pnar / Jaintia khnang ban ym mih kano kano ka kynum kynram.
Shuh shuh katkum katei ka shithi la kyrpad ruh ia u Deputy Commissioner ban pynsangeh shi syndon ban ai Scheduled Tribe Certificate sha kino kino ki briew kiba don jingthmu ban pynsniew ia ka jait Kur ka Kmie, kiba long kiba shim kur na ka mei kha ne ka kmie u Kpa kumjuh na u shyrang na u Pa, namar kane ka long pyrshah ia ka longbriew manbriew ka jait ka kur na ka Kmie.
Ka Dorbar Ki Waheh Kur, Ri Jaintia ka la leh ia kane na ka daw ka jingsngewkhia namar kila iohi ba ha kane ka juk mynta, ka rukom ioh Scheduled Tribe ki briew ka long kaba pynar tatien kaba lah ruh ban buh ia ka jingma kaba khraw ia ka Ri Jaintia kumjuh ruh ia ka jait bynriew kaba shim ka jingai jait na ka Kmie.
Na ka liang u DC B.S.Sohliya ha ka jingdonlang ka B. Blah MCS Additional Deputy Commissioner ka West Jaintia Hills, u la kongnguh ban iatreilang bad ka Dorbar ki Waheh Kur Ri Jaiñtia. Ha ka juh ka por ka Dorbar ka khmih lynti ruh ba ka JHADC kaba la pynkupbor da ka Aiñ Six schedule ka riti treikam ka ri India kan pynkloi ban ai ia ki kyrteng ki Kur bad ki Waheh Kur dorbar Kur kiba dei hok ban ioh Schedule Tribe khnang ba yn lah ban pynbha pynskhem shuh shuh ia ka rukom rukom ai ST na ka office DC na baroh ar tylli ki district ha Jaiñtia.