Ka Federation of Khasi Jaintia & Garo People Sengkmie lyngba u Vice President Central Body u Kitboklang Nongphlang u la phah da ka jingthoh sha u CEM ka KHADC na ka bynta ban ym ai trading license sha ki riewshimet ne sha kino kino ki kompani shimet ne ki Non Tribal Agencies.
Ha ki khyndiat bnai ba la dep ka seng ka la dep khang bad pyrshah jur haba iadei bad ka jingkhot applikeshon Security Guard, lyngba ki kompani shimet bad ki agencies bapher bapher ba la pyllait da ka National Institute of Fashion Technology (NIFT), hadien ba ka seng ka la dep ban bishar bniah ia ki kyndon thep kam la lap ba ki long pynban kumba plie lad plie lynti ia ki kompani na shabar.
Ha kane ka kynti ba mynta ka FKJGP ka la ioh ruh ia ka jingujor na ka National Institute of Technology (NIT) Meghalaya kaba la pyrshang ban bud ia ki juh ki sienjam kum ka NIFT ban plie lad ia ki kompani na shabar.
Kumta ka Seng FKJGP ka kyrpad ia u CEM ka KHADC ban shimkhia bad tehlakam ia ka rukom ai trading license sha kino kino ki kompani na shabar kiba pyrshang ban knieh noh ia ka kam kamai japoh jong ki trai ri, trai muluk, lyngba ki kam khaiï pateng kiba ki trai ri ki lah ban bad hi ia ka kam khaiï pateng.
