Ka Hynñiewtrep Integrated Territorial Organisation (HITO) Sengkmie ha ka 13 tarik Rynphang 2026 ka la iakynduh ia u Dr. B.D.R. Tiwari, Chief Electoral Officer (CEO), Meghalaya, ha kaba ïadei bad ka Special Intensive Revision (SIR) kaba dang ïaid shakhmat.
Ha kane ka jingiakynduh, ka HITO ka la ai ia ka memorandum kaba pyrshah jur ia ka jingpdiang ia u Aadhaar Card kum ka kot pynshisha ban pynrung kyrteng ia ki nongthep vote. Katei ka seng ka la pynpaw ba ia u Aadhaar lah ban ioh da uno uno u briew uba wan na shabar ka jylla, kynthup ia ki nongwan buhai shnong na Bangladesh bad kumta ym dei ban pyndonkam ia u na ka bynta ban pynrung kyrteng ha ka thup kyrteng jong ki nongthep vote.
U President ka HITO u Bah Donbok Dkhar haba kren sha ki lad pathai khubor u la ong ba ka jingpyndonkam ia ka Aadhaar Card na ka bynta ban ioh ia ka EPIC (Electoral Photo Identity Card) ka buh jingma kaba khraw, khamtam eh namar ka jingma kaba khraw ki poiwir na Bangladesh bad na kiwei kiwei ki jaka ban rung ha ka thup thep vote bad suki suki ban shim noh ia ka hok trai ri trai muluk.
Shuh shuh u la dawa ba ki bor ba dei peit ki dei ban ailad bad ithuh ia ki syrnod ba la ai da ki Dorbar Shnong, Dorbar Raid, Hima, bad Dorbar Kur kum ki kot ki sla kiba biang ban pynshisha.
U la kdew ruh ïa ka jingdawa kaba la slem bha naduh u snem 1966 hapoh ka Assam Accord, da kaba pynpaw ba ïa ka aplikeshon kham mynshwa la aiti da u Bah M.N. Majaw, MLA bad Myntri barim, na ka bynta ban pyntreikam ïa ki kyndon jong ka Assam Accord.
Ka HITO ka la ban jur ba ka Special Intensive Revision ka dei ban long kaba pyrkhing bha bad kaba phikir bha ban ithuh bad weng ïa ki jingrung be-aiñ.
Na ka liang u Chief Electoral Officer u la pynpaw ba kane ka kam ka long kaba kongsan bad yn sa rah sha ka sorkar pdeng bad sha ka election commission jong ka Ri India ban bishar bniah.
