Ka Hynñiewtrep Youths’ Council (HYC) War Jaintia Circle ka pynpaw ia ka jingsngewkhia halor ka jinglong jingman jong ka Surok Amlarem-Dawki NH-40 E ha kine ki kyndiat taiew namar ki truck kit dewiong jong kito kiba kham High Level ki ioh ban iaid sahuh, khlem jingsalia.
Kane ka ktah shisha iaka leit ka wan jong u paidbah babun balang khamtam kito kiba thmu ban leit sha ki jaka pule ne leit trei leit ktah.
Kumta ka seng lynba une u kyrwoh ka kyntu ia ki bor pyniaid District bad ia ka Amlarem Civil Sub-Division ba kin shimkhia bad ban leh eiei mardor halor kane ka jingiaid laitlan jong kitei ki truck kit dewiong, kumjuh ruh ba kin tuklar ha ka ba iadei bad ka jingkit palat pud (Over loading) ka ba la pynlong ia katei ka surok ba nangsniew nangsniew katba dang mih ki sngi. Ka seng ka maham ruh lada jia ba ki bor District ne Civil Sub-Division kim shimkhia ia kane ka jingkyrpad ka seng kan sa shong pyrkhat bad kan sa leh ia kaba donkam.