Ka Jaintia Students Movement (JSM) ka kyrpad ia u Deputy Chief Minister u Sniawbhalang Dhar bad u Health Minister u Wailadmiki Shylla ba kin iasiad lem hapoh Cabinet khnang ban wanrah noh ia ka bhah na bynta ki nong Jaintia ha ka Reservation Policy khnang ban pynskhem ia ka jingieit jong ki ia ka jaid bynriew Pnar.
Ka seng ka don ka jingkyrmen ba skhem ba lada kine ki ar ngut ki Minister ba don burom jong ngi na ka Ri Jaiñtia ki kloi ban ia kren ha ka Cabinet ka ba ialam da ka party ba ki ne ki nongialam jong ngi ki don, ngim artatein ba ka Jaiñtia kan ioh la ka jong ka bhah ha ka Reservation.
Ka seng ka kynmaw ha ka por ialap Eleshon ka jingrwai ialap eleshon jong ka NPP ha ka MP eleshon ka ong “to ieit jaidbynriew da ki kam ym tang da ki ktien” te kumta mynta ka dei ka kynti kaba biang ia kine ki ar ngut ki Minister ba kin ieng Rangbah kum u Kiang Nangbah ban dawa ia ka hok ki nong Jaintia bad lada kim ioh “ki dei ban iehnoh ia ka jinglong myntri ruh na bynta ka bha ka miat ka jaid bynriew Jaintia.”
Ka Seng ka iohi ba u MLA jong ka VPP na Nongkrem u bah Ardent M Basaiawmoit u la wanrah ia ka short duration discussion halor ka reservation policy ha ka 25 tarik u bnai Rymphang 2026 bad ha katei ka jingkren jong u Bah Ardent u pynmih tang ia kyntien Khasi ym Khasi Jaintia bad kane ka la pynbynniaw ia ka Seng.
Ia kane na ka liang ka JSM kam pynrem ia u ne u rangbah namar u ieng ha la ka nongrim ba lah ban dei ka interest jong ka party jong i lane lah ban dei ka idiology shimet jong u.
Hynrei ka Seng ka kham sngewsih namar u ma Sniawbhalang bad u Ma Wailad ki khlem raise point of order ha ka por bym pynmih ia ka kyntien Jaintia da u Bah Ardent mardor bad balei kitei arngut ki MLA ki shim por haduh ar Sngi ban raise ia ka point of order kata ha ka 27 tarik u bnai Rymphang ban kynthoh.
Kumta ka seng ka kyrpad rit ia u Dy.CM ba donburom ka sorkar ba un iakren tangeh ban pynioh bhah ia ngi ki Jaitbynriew Nong Jaintia ha ka Reservation Policy. Ngi ki nong Jaintia ngi long ki ba dang sah dein ha ki kam sorkar bad ha ki liang baroh.
Ka jingpynskhem na ka liang ka seng JSM ngim thew iano iano ban pynpait Jaitbynriew hynrei ngi thew mano mano ruh shisien ba phi la long nongialam toh bat skhem ia ka nongrim long rukom long nongialam khnang ba phim ym long kita ki ban pynshit lane pynbakla ia ki khun samlan bad ia ki khun ki hajar ka bri u Hynniewtrep hi baroh kawei. “Ngi ngi long shi para kum ka Jaitbynriew Khasi-Jaintia bad ngi long kawei kum ka Jaitbynriew Hynniewtrep”.
