Ka Jaiñtia Student Union (JSU), Khliehriat Circle ha ka 25 tarik u Rymphang 2022 ka la leit ban ujor bad dawa ha u DC ka East Jaiñtia Hills District na ka bynta ba ker Railaing ia ki rud surok kiba doh ha Ladrymbai bad Khliehriat.
Ka seng ka la bynrap ruh da kaba ong ba khnang ban lait na kino kino ki jingjia ba sngewsih dei ban ïada ïa ki lynti iaid kjat baroh arliang bad kumjuh ia kiba ñiah kali. Ka seng ka ong ruh ba ka jingker Railing kan iarap shibun ia ki paitbah khnang ba kin poi sha ki zebra crossing point lane ka jaka ban kam na shiliang sha shiliang ka surok ban lait na ki jingmynsaw.
Ka JSU ka la ong ruh ba ha kine ki snem ba la dep la don ki briew kiba ïap bad kiba mynsaw ha ki tei ki ar tylli ki shnong ba long sor ka District ka East Jaiñtia Hills na ka daw ba ym don Railing ban ïada ïa ki paitbah ha ka leit ka wan.
Kumta ha kaba ïadei bad kane na ka liang jong ka seng ka la kyntu ia ka sorkar lada long kaba lah ban pynshna ia ki Roadside Pedestrian Safety Railing System khnang ban lait na ki jingjia ba sngewsih bad kumjuh ia ki nongniah kali ha Ladrymbai bad ha Khliehriat.