Ka Jaiñtia Tribal Traders’ Association (JTTA) kawei na ki seng kaba peit ïaka bha ka miat jong ki nongkhaïi hapoh Ri-Lum Jaiñtia, kala kyntu jur ïa baroh ki nongshong die kiba don ïa ki Permit ha ki bynta ka Iawmusiang bad Iawthymme hapoh ka jingpeit jong ka JHADC ba kin sangeh shwa ban leit siew pynthymmai ïa ka bai Permit jong ki kaba shisien shisnem.
Kane ka jingbthah na ka JTTA sha ki para nongshong ïew ka long hadien ba ka Council kala pynkiew ar shah (double) ïa ka bai Permit, kata na kaba juh siew tang 750 tyngka sha ka 1,300 tyngka ha ka shi snem.
Shuh shuh ka seng kala ïathuh ha kaba ïadei bad kane ka kam pynthymmai Permit, ka dang don mynta hapdeng ka jingïakren bad ki bor jong ka District Council, kumta ka seng ka kwah ban ïoh shwa ïa ka jubab ba shai na ka Council halor katei ka dor Permit.
Ha ka juh ka por ka seng kala dep ban phah da ka shithi sha ka District Council ha shwa ban pynlong ïaka Election MDC, da kaba leit kynduh ïa i Officer Incharge jong katei ka tnad, hynrei kila ïoh ka jubab ba yn sa phah ïa kane ka sha Executive Committee ba thymmai jong ka Council.
Kumta ka Jaiñtia Tribal Traders Association lyngba u ma Iatha Najiar uba dei u President ka seng, kala buh ka jingkyntu bad kyrpad jur ïa baroh ki nongshong ïew kiba hap ban pynthymmai ïa ki Permit ba kin long kiba ïaishah shwa shipor haduh ban da ïoh ïa ka jubab na ka Council.