Ka Meghalaya People United Front (MPUF) East Jaintia Hills District mynta ka sngi, hapoh ka jingialam jong u President u ma Kyrshan Blah ka la leit buh dorkhas ha u Deputy Commissioner jong ka East Jaintia Hills District, ban kyntu ia u ban bthah noh mardor ia ka National Highway Authority Of India (NHAI) ban maramot ia ka jingbym biang ki nala um harud surok bah kiba don ha ki bynta jong ka Khliehriat East bad Khliehriat West jong ka East Jaintia Hills District.
Na ka liang jong ka seng ka lap ba ka jingshna nala da ka NHAI ha shilynter jong u surok bah ha ki bynta jong ka shnong Khliehriat ki long ki bym biang. Ha ba jur u slap ki bynta jong u surokbah ka shlei um kaba lah ban wanrah ka jingma ia ki kali bad ia ki briew ba iaid lynti ruh. Ia kane ka jingslei um la lap ha ki bynta jong ka Lad Pohshnong, Lad Dongmootha pyrshah ia ka Family Mart, Lad block pyrshah ia ka Ladvika complex bad kiwei kiwei de ki jaka. Kane ka jingiohlad jong ka um slap ban sah ne lang shijaka ka lah ban pynjot kloi ia ka surok kumjuh ka pynthut ia ka leit ka wan jong ki paidbah tang na ka daw ka jing bym biang kine ki nala ne ki side drain. Don ruh ki bynta ba kane ka um na u surok bah ka tuid wat sha ki lynti shnong bad ïingbriew.
Na ka liang u Deputy Commissioner jong Ka East Jaintia, u la kular ba un shim khiah ia katei ka jingdawa jong ka seng ha kaba u la kular ia ki nongialam jong ka seng ba un sa khot ia ka jingialang ki rangbah shnong jong ka Khliehriat East bad Khliehriat West khnang ban ioh ban iatreilang bad ka ophis jong u na ka bynta ban ioh noh ia ki nala um kiba biang (proper drainage) ha kine ki shnong.
