Uwei na ki member jong ka State Co-ordination, coal miners Dealers & Transportation Association mynta ka sngi ka 30 tarik Naitung 2024 haba iakren sha ki lad pathai khubor u la kyntu ia ka sorkar Meghalaya ban pyntreikam noh ia ka scientific mining bad ban ailad noh ia ki Trai jaka ban trei dewiong wat ia ki bym don jaka hapoh ka 100 hecter. Ki la pyntip ruh ba ka sien jam ba kin shim lyngba kane ka association ka long ba kin pynlong ka jingialang paidbah sha South West Khasi Hills, Nongstoin bad kiwei kiwei ki jaka kiba don ia ki krem Dewiong.
Ki pyntip ruh ba kin pan jingkyrshan na baroh 3 ngut Ki MP ka Meghalaya kata ia 2 ngut ki MP ba dang shu shah jied thymmai ia u MP na shillong u Dr Rikcy J W Synkon bad ia u MP na Tura u Saleng A Sangma bad u DR W.R Kharlukhi MP ka Rajya Sabha bad ki la ai da ka jingthoh sha kine baroh 3 ngut ki MP ban buddien ia kane ka kam ha Parliament bad kumjuh ruh ha Ministry of coal mining.
Kumban shu pynkynmaw katkum ka standard Operating Procedure jong ka Sorkar Meghalaya ha u snem 2021 ka la ong ba kiba lah ban trei dewiong kim dei ban duna ia ka 100 hecter, hynrei na ka liang ka Association ka la ong ba ka long kaba eh ban don ia ka jaka haduh 100 hecter namar ka la bun palat ka jaka ban pyntrei ia u dewiong bad na ka liang ka association ki kyntu ban ailad noh tang 5 hecter ban trei ia u Dewiong khnang ba ka nym ktah ia u paidbah ba bun balang ba trei ia kane ka kam Dewiong.